實在係有啲忙，因為而家讀書個度好多功課，而我做功課速度又好慢．．．
我地而家係2個阿sir 教，Monday Sir 係苦榮個畫家，估唔到係佢教呀，我都好鐘意苦榮架嘛，有幸比佢教真係好開心，同埋呢個阿Sir好好人，教得都好細心，又唔會趕住走，我好Like佢！
Thursday Sir就係好老土個啲老師囉，成日會講啲野串下你咁，同埋好多功課，我就真係麻麻地佢．．．
而家上堂成日都要畫公仔，我係一個畫公仔白痴黎架嘛，真係獻醜。咁我諗咁樣落去唔係辦法，所以我就上網學畫公仔，希望一日最少都畫一幅小圖啦！
－－－－－－－－－－－－－
睇返旅行啲相，覺得自己成日黑衫黑褲唔好睇．．結果我又破財喇．．．去台灣既時候，覺得CACO既衫好平。所以今次我就試下佢個網購，買左成$600多，其實仲有睇中，不過再買真係破產喇，所以就停左手！買左成六件衫褲，都只係六百幾蚊，真係超抵，最抵係咁多用順豐送黎香港都只係費用$28，真係抵到爛！
今次我寫自己地址啦，到左香港後，順豐打黎話送去我屋企就要加$18，去佢個度拎就唔洗加錢，咁我梗係去個度拎慳返啲啦！去到拎個時，個職員問我係用自己地址定係用順豐地址，乜原來可以直接寫順豐地址架！？下次再買時試下先！
－－－－－－－－－－－－－－－－－－－
有日見涷涷地走左去廟街食煲仔飯，叫左炒蜆，菜，蠔餅同免牛煲仔飯（唔記得影相），炒蜆好咸唔好食，菜同蠔餅都OK，個煲仔飯都好好味，最好味係啲飯焦！ 每人都成七十幾蚊，有啲貴呀！
－－－－－－－－－－－－－－－－－－－－－－－－－－－－－－－
返學係九龍塘，放學就去又一城睇下有乜食啦，見到板長做特價時段就入去食啦！
而家板長係用IPAD MINI落單架，好過癮，我第一次見到渣！
我地都叫左好多野食，不過呢我都係鐘意食元氣多啲，呢度都係唔夠元氣好食！
每人都成一百蚊，又話特價時段既，都咁貴既，都係去返元氣好啲！
－－－－－－－－－－－－－－－－－－－－－－－－－－－－－
最佳女主角最近係千嬅做嘉賓，我特登上網睇返架！見佢問佢同填詞人既關係，仲諗住佢會問Wyman 同佢鬧交件事添，點知冇！
不過從個訪問中就聽得出千嬅真係一個好堅持同落力既人，佢定左目標之後，就會用全力去到達個目標到，呢種精神真係要學下！
－－－－－－－－－－－－－－－－－－－－－－－－－－－－
最近有時懶出街食飯，就食麥皮，買返呢隻好耐冇食過既麥皮！
記得上次去歐洲旅行（轉眼都六年喇．．．），因為我地冇乜錢，就帶左米粉、麥皮同薯蓉去，真係刻苦。呢隻麥皮陪左我好多日架，咸咸地都幾好味架！果時因為咁食飯，我仲瘦左成十磅，好想再去多次歐遊同瘦返十磅！！
