玩完首爾喇.......

嘩, 睇返有咁多個月未寫過BLOG, 真係痴線架, 點解我可以懶到咁架!

而家係香港時間2點幾，韓國既話就已經係３點幾喇，我其實好眼訓，但又好想打下今次旅行既感受出黎，因為驚耐左就會唔記得。

話說我有成16年無去過韓國，你地都知韓國改變幾大，上次去仲要係跟團，今次既感覺真係好唔同！

我係記得韓國人係會推開人呢啲無禮貌野，但我真係無諗過首爾既服務業係咁無禮貌！！

當然可能係我當黑啦，又或者係文化差異啦，可能佢地唔係咁無禮貌既，係我要求高啦！

話說我買左兩對波鞋，兩次都係ABC Mart，買鞋當然要試鞋，問個sales 拎鞋都係樣衰衰，有一個仲重複左3次我係咪要thirty nine? thirty nine? thirty nine? 跟住我話要啦，都係有少少樣衰衰咁，點知到佢要sell我買支洗鞋水時，個樣即刻笑哂，超大對比.....
仲有比錢個時，個收銀完全同我零交流，連多謝都無講聲，眼神交流都無......

除左個次之外，其實個邊既收銀，大部份都係咁，好似好唔耐煩，完全唔想做你生意咁。最誇張個次係樂天，我地只係問左句個收銀，係咪buy 1 get 1 free時，個收銀阿嬸即刻"miu"你.......

不過調轉頭黎講，個邊做服務業好好，可以咁自我，而我都見到佢地係咁玩電話，就算有人入到店入面，佢地都完全唔理你。

講住咁多先...希望明日再續

Day2.2 大阪遊記2015--梅田KiddyLand+道頓堀

哈哈，係咪好奇怪，轉眼間就黃昏！？　

其實係返完酒店，食完個lunch就過黎架喇！

我黎到梅田，第一站就去左KIDDYLAND，即係專賣玩具既地方，當時仲因為要幫個朋友買野（個朋友諗左好耐，我以後都唔會用咁多時間幫朋友買野呀）。

其實梅田都有好多野睇，有個空中庭園展望台（強烈建議如果好天，大家一定要去，我見我朋友啲相好正架），仲有摩天輪搭！

不過全部都同我無緣呀，下次我一定要留多啲時間去梅田！

呢間咁大既百貨公司，我都上左去睇左一陣架

好，睇下當日我睇左乜野玩具

KiddyLand 地址:梅田阪急三番北館1F

呢隻我無記錯係SNOOPY個阿哥, 肥肥地好得意, 我都買左呢隻公仔細版返屋企

呢個幫另一個朋友買, 影相比佢揀既, 結果買左上面個款, 朋友勁鐘意

不過呢, 價錢唔平, 但個內膽個袋竟然唔係用布整, 係用不織布整, 朋友話好快就爛左個內膽喇!

JACKIE'S都係我至愛, 不過無睇中野呀

仲有美少女

我好鐘意飲日本既朱古力奶，好滑

跟住就返去難波, 我唔記得呢間係乜野百貨公司, 不過大家經過, 又鐘意hello kitty既話, 記得入去, 遊客可以申請張遊客卡, 買野平少少架

我見時間都夜, 自己都買左個炸豬扒三文治, 不過味道好普通

點解人地啲街景咁靚既?

跟住我再買呢個芝士蛋糕 (雖然而家香港都有得食), 排左一陣隊啦, 都幾多人架!

就黎聖誕節, 包裝都唔同

連個印都唔同

食完就去道頓堀

呢度好旺, 好靚!

咁我見到咁平餃子無理由唔食啦, 香港都無咁平! 同埋好平, 我好鐘意食

呢個公仔而家好似換左喇

我遲左一步, 買唔到呢間既芝士tart，不過後來終於係東京食到，但係涷既，即刻好失望！

跟住，就係到我最愛既激安之殿堂

成間店都係香港人，好好笑！

今日既戰利品，都唔係好誇張啫

Day 2.1 大阪之一個人的浪漫 2015/12月--黑門巿場

今日都成十點左右先起身, 因為琴晚搞得實在太夜喇。

朝早就可以周圍睇下酒店附近係點喇, 附近原來係賣煮食用品同傢具，酒店同黑門巿場好近，大約10分鐘就到喇!

酒店周圍有啲好得意既宣傳畫

好，到左黑門巿場喇，呢度都幾似街巿架，咁有賣魚生、生果、海膽、和牛等等

係啲商業地方，有咁大個地方，唔洗錢比你休息，係香港真係未見過！！

而家睇返相，我好想個海膽呀，我個時點解會唔買架！！

我買左呢個做早午餐，味道其實無乜特別呀，可能呢隻太平喇，如果想食啲同平時唔同既牛，一係買返隻貴啲，一係不如慳返唔好食。

即場鐵板燒

個樣都呃得下人架

當時應該士多啤梨當造，勁多士多啤梨，我都買左盒，不過我梗係買啲平平地呢，買左幾百丹個啲

仲見到有盒好得意既壽司，買左盒返酒店試下，但唔好食呀。。。

食飽飽就準備去梅田喇

大阪之一個人的浪漫 2015 第一天

6/12-11/12/2015

話說在上年年尾先開始留意HKEXPRESS, 結果就比我係短時間內買左大阪同東京來回既平價機票!

第一次自己去旅行, 當然有啲啲驚, 最緊張既係機場來回難波個兩程, 因為呢兩程拖住行李, 搭錯好麻煩之餘, 搭的士又會貴到飛起。

今次有呢隻KUMAMON陪我去旅行

咁係平價機票就真係唔可以要求咁多, 
5點香港出發；夜晚9點20分先到達關西機場。因為好鐘意睇雲, 所以就加左錢坐窗口位。點知我影左幾張之後, 諗住拎本旅遊書出黎睇下先啦, 眨下眼個天黑哂.... 我加啲錢加得好唔抵呀...

係機上面繼續睇下旅行書, 話咁快就到左大阪喇!

咁我呢個緊張大師, 同埋今次得自己一個,  成日驚無尾班車所以好緊張!

大家想知點樣由機場去難波, 可以到小氣少年BLOG http://nicklee.tw/?p=494

本身我諗住搭南海電鐵, 因為我間酒店就係電鐵附近.... 點知......一去到票務處, 竟然話停售..... 我又唔識日文, 都唔知發生乜事><

咁惟有搭我無諗住搭既JR啦, 因為全部人都係搭JR, 所以無位坐! 我入落到月堂就見到有架車, 問個職員, 佢話係去難波, 就衝左上車, 但上到車就有啲驚搭錯車, 因為我完全見唔到難波站既...

最後, 勁上網搵既情況, 先知原來搭JR到難波要轉車既!結果搞左咁耐都成11點先去到難波JR站......

去到難波JR站, 望左陣都唔係好識由JR站到南海電鐵站(其實應該得架,可惜我唔識><)

我又好肚餓, 都成11點幾喇, 惟有係汽水機禁左罐粟米湯飲! 跟住就禁住GOOGLE MAP, 衝過去酒店。

條路黑黑地, 又得我一個, 好鬼驚。
間酒店仲要唔係係啲大街度, 仲驚><

結果我12:10先返到酒店, 今次我住大阪日精商務酒店, 間酒店都幾舊呀, 你睇仲用緊鎖匙就知幾舊啦! 

咁我放哂行李就出去搵間便利店去食飯喇, 好肚餓!

由於唔熟路同天黑關係, 都兜左一陣先搵到7-11, 結果就買左以下蛋包麵返酒店食~

其實都算幾好味架, 主要係啲汁好味!

最後甜品, 我呢就覺得普通啦!

大阪遊記陸續有黎~

(今次係旅遊途中無寫遊記, 而家要打返出黎真係有啲困難, 下次唔會咁懶喇!)

大阪難波日精商務酒店日星商務酒店Business Hotel Nissei

好耐無寫BLOG 喇, 而家有3個遊記等緊我寫, 好想完成佢呀!! 

之前去大阪拍左條短片講我住個間酒店--

大阪難波日精商務酒店(日星商務酒店) Business Hotel Nissei, 揀呢間酒店都係因為平啦, 位置都算OK, 但但有樣好大既缺點, 就係佢隔音好差, 成日都聽到走廊既聲音, 夜晚直頭聽到隔離房講野.. 

下次既話...都要考慮下訂唔訂呢間喇~

終於都要換喇+搶到HK EXPRESS機票

好耐無寫BLOG, 唔可以比自己咁懶, UPDATE下我近況先。

先講最近大出血, 係勁出血個隻。

首先有日陪朋友傾電話計劃時, 我無端端出左Iphone 6s plus......真係真係好似撞邪咁....

咁就無左八千幾蚊喇!

話說我上一部係Iphone 5, 用左大約3年, 舊電就已經壞壞地, 打機既話, 用一個鐘就會無電, 仲要成日30%熄機, 可能因為咁, 我就神推鬼X底下, 出左部新電話。

咁新電話真係好用好多既, 起碼舊電可以比我用一日, 仲有佢係128G, 我之前部32G, 我都用到唔夠位, 而家好好多。

不過再話時話, 我個時去賣左部舊機時, 唔知係咪比人壓價, 900蚊就賣出喇 ><

--------------------------------------------------------------------------------

講完電話, 就講旅行, 話說我咁耐以黎都訂唔到特價機票, 次次都LOAD唔到入去。

點知原來, 如果間航空公司多機票, 只要遲幾個鐘入去就買到喇。

不過我今次張東京機票, 因為要就埋個朋友, 跟住加加減減後, 張機票係平左少少渣。

但係去大阪張機票就好抵喇, 因為我一個人去(我第一次一個人去旅行), 時間自己就, 比我買到8XX機票, 超開心!!

滿心期待ING!!

(話說我上次去東京時無寫BLOG, 而家諗返起真係乜都唔記得, 所以今次我一定要寫返BLOG呀!!!)

仲有就係, 我離開左我工作左7年既公司, 前途茫茫中, 不過我又好享受而家既FREE, 希望下次搵到份好工!

順帶一提, 我個FB PAGE係https://www.facebook.com/alikaplayground

澳門HEA到盡遊記

今年生日慶祝活動－－過大海。

因為金光飛航生日月份可以以優惠價（230左右來回）買船飛，所以就過澳門玩下啦！

不過唔知係咪優惠，啲時間勁衰，下午一點去，下午七點返。而且個售票員態度又勁衰!

落船乙水仔，可惜我地住既十六浦係無車係呢邊架。。。。我地又唔識搭車，結果係個度左搞右搞，差不多成個鐘先上左去葡京既車。

酒店相後補。。

去到酒店，搞埋CHECKIN都成四點半，我地就立即換衫去游水，我呢個大鄉里，第一次係酒店游水，完全唔知有會有LOCKER同大毛巾提供！！

好趕急咁游完水，就到左我地今晚既重點節目，就係去MGM既夜晚BUFFET，由六點至十點！！正！

每枱都有既麵包，好脆身，都幾好味，不過梗係唔食咁多啦，要食啲貴價野架嘛！

長腳蟹係我至愛，呢度啲蟹都好好味，超正！

啲三文魚魚生好好味！正！

熱盤真係遜色左少少，而家做緊東南亞風味。。。我地真係黎得唔及時。

甜品有雪糕，仲好好味，我好快食哂，無影相呢！

但其他蛋糕甜品就麻麻，係得個葡撻好味！

其實仲有生蠔（好味）同埋龍蝦，龍蝦勁搶手，但我完全唔覺得好味，都係芝士焗龍蝦最好蝦。

食完我地又走左去行八百伴，跟住就返酒店喇！



第二朝，我地JOIN左十六浦早餐BUFFET，呢個真係高水準，好多野揀，勁力推介，個牛角包好好味！！仲有蘋果批、粥、生果、魚蛋粉、粟米片等等

我地呢個勁HEA之旅，食完早餐，又去賭場行個圈（行一個圈就無左二百幾蚊喇！）

跟住我地盲無目的咁行，又見有啲肚餓，竟然揀左鼎泰豐食飯。。

不過又真係幾好味，又唔洗等位！

呢個冷盤海哲好好味！

每次黎都必食炒飯

要補充下纖維

呢個就麻麻地！

最後，我地去左舊葡京買澳門手信，超好味既曲奇！

呢隻曲奇真係好好味，又唔洗排隊，超正！後悔淨係買左盒細返屋企，下次要黎掃多幾盒先得！(最近好鐘意相入面個隻公仔)

今次旅程，由於我地係廢青，又無乜特別地方想睇，結果差不多無離開過冷氣地方就返香港喇！