終於都要換喇+搶到HK EXPRESS機票

好耐無寫BLOG, 唔可以比自己咁懶, UPDATE下我近況先。

先講最近大出血, 係勁出血個隻。

首先有日陪朋友傾電話計劃時, 我無端端出左Iphone 6s plus......真係真係好似撞邪咁....

咁就無左八千幾蚊喇!

話說我上一部係Iphone 5, 用左大約3年, 舊電就已經壞壞地, 打機既話, 用一個鐘就會無電, 仲要成日30%熄機, 可能因為咁, 我就神推鬼X底下, 出左部新電話。

咁新電話真係好用好多既, 起碼舊電可以比我用一日, 仲有佢係128G, 我之前部32G, 我都用到唔夠位, 而家好好多。

不過再話時話, 我個時去賣左部舊機時, 唔知係咪比人壓價, 900蚊就賣出喇 ><

--------------------------------------------------------------------------------

講完電話, 就講旅行, 話說我咁耐以黎都訂唔到特價機票, 次次都LOAD唔到入去。

點知原來, 如果間航空公司多機票, 只要遲幾個鐘入去就買到喇。

不過我今次張東京機票, 因為要就埋個朋友, 跟住加加減減後, 張機票係平左少少渣。

但係去大阪張機票就好抵喇, 因為我一個人去(我第一次一個人去旅行), 時間自己就, 比我買到8XX機票, 超開心!!

滿心期待ING!!

(話說我上次去東京時無寫BLOG, 而家諗返起真係乜都唔記得, 所以今次我一定要寫返BLOG呀!!!)

仲有就係, 我離開左我工作左7年既公司, 前途茫茫中, 不過我又好享受而家既FREE, 希望下次搵到份好工!

順帶一提, 我個FB PAGE係https://www.facebook.com/alikaplayground

韋家輝

最近有點兒懶, 少寫BLOG.......

最近重播大時代, 暫時我都無乜點追, 我想等劉青雲出現先開始睇。

大時代套片簡直令我又愛又恨, 套片係好好睇, 但係睇到丁蟹咁癲.........劉松仁明明咁好人, 但最後被丁蟹害到破產, 仲最後被佢打死埋!  跟住丁蟹一家好似仲未夠喉, 仲要害死埋玲姐同佢埋展博啲細妹。

你諗下係一套戲入面要睇住咁多人死, 仲要死親都係好人, 心理真係好難平衡!! 仲要聽埋丁蟹啲歪理, 真係好難忍受!  為左報仇要死咁多人, 咁係咪唔應該報仇會更好?

由於我覺得個編劇一定有理由先咁寫既, 所以我就不斷search編劇韋家輝的資料。

好多人話韋家輝電影成日講宿命, 但究竟乜野係宿命呢?? 

我而家好想睇返哂韋家輝既電影, 而家我仲煲緊大隻佬既影評, 睇黎有排睇!

Online Shopping

近這一、兩年多左係網上買野, 以前最多係淘寶買, 不過有啲淘寶衫質料好差, 買過一、兩次就無買喇。

近年, 買衫最多係CACO, 係一個台灣

http://www.caco.com.tw/Shop/

台灣網站, 用順豐到香港, 一個包裹大約50元, 看衣服重量啦!

我鐘意這間店, 主要是價錢平, 衣料質地好, 台灣的衫褲鞋襪, 簡直超值的!

不過呢都都買左幾條褲唔啱著...唉隔山買衫, 始終差啲><

最近又到香港一間網購買, 主要係有50元coupon, 我承認我太貪小便宜喇!

$50 COUPON 在此, 3月31日到期

http://www.fingershopping.com/t15ru5c.html

網站網址: http://www.fingershopping.com/

不過呢網購有樣唔好, 就係唔係拎住實物, 會估唔到SIZE同睇漏野囉!

我總共買左2次, 用埋個FD既COUPON。

第1次買左啲焗荼物品, 塊MASK係為左籌夠錢既,

但啲茶包我睇錯左囉, 原來得3包, 我以為有6包, 足足DOUBLE左價錢, 

唔抵買!

第二次我就買洗面同eye gel, 支eye gel無問題, 但支洗面勁細支!!

我認我又無好細心睇佢份量...又衰左!

呢間SHOP有時都有平野既, 最好既係買滿150, 

可以free去OK拎貨, 仲可以去到OK先比錢!

之後, 應該會去買埋維基既HKTV既,

因為個度又送左一百元coupon,

個度好多玩具買, 買完再分享比大家睇下!

運動運動運動

又病左，

皮膚敏感之餘又咁啱食錯野，腸胃炎。

本來希望羊年之後可以健康啲，但結果都係要去睇醫生。

其實無乜做過啲乜，又真係唔會無端端健康左既，

睇黎我真係做運動喇，真係要的起心肝做運動！

不過真係年紀大機器壞，而家一腸胃唔舒服，就要好幾日先可以好番。。。。

睇黎係時候睇下有乜可以進補下先得。

工作上的牢騷

等我發下牢騷先

我都唔明點解有啲人咁鐘意擺款，仲要最近係我公司個啲都係後生個批（細個我就叫後生啦）,唔知係咪真係唔同年齡唔同風格。

話說我地公司有幾層, Senior A 要落去下面幾層開會, 佢首先開會前就CALL人拎個FILE 比佢, 咁大家以為佢唔記得拎, 就無乜野啦。

點知開完會喇, 佢CALL人落去收野, 咁個同事問佢無野收呀? 收乜呀?
佢答人地收個FILE!
洗唔洗呀
佢自己都要上返黎自己個位架啦, 拎埋個FILE上黎都唔係好重啫, 仲要自己哂時間係樓下等個clerk落去, 等完先自己上返黎!
你請左個clerk渣, 唔係請左個OA/工人呀!

以前同一個位既Senior, 大住肚都自己拎FILE上上落落啦! 佢都唔知係咪殘廢架!

------------------------------------------------------------------------------
話說我公司有另外一個Senior B, 佢又係好經典。成日比野人做既時候, 會講好多助語詞, 唔係粗口, 但係都係難聽!

唔係好多啫!
兩份啫, 你好快做完!
好簡單啫!
都係COPY & PASTE啫!
呢份急架!

份份佢都話急, 我地已經唔理佢! 仲要成日都講到啲野好快做完,好簡單咁, 大佬有時啲唔係你想像中咁簡單架, 都要時間去做架!
做野係ok架, 但唔洗加你啲comment落去囉！
－－－－－－－－－－－－－－－－－－－－－－－－－－
最近有朋友間公司執笠，咁公司就遣散佢地啦！
朋友就好勞氣話公司筆遣散費不單止係由公司供個筆MPF度拎出黎，仲拎埋佢用MPF投資賺既錢出黎遣散！
佢覺得自己好眼光投資得利既錢，點解要比個老闆拎黎做遣散費！

不過政府條例就係咁衰，根本就幫哂班老闆。其實遣散費可以係MPF度拎已經好唔合理，咁樣個老闆根本就著數哂！

MPF個原意係幫個僱員儲錢養老，但老闆個筆就可以拎黎做遣散／長期服務金，咁即係老闆個筆無左啦，咁如果得個僱員自己儲錢，做乜唔自己儲，要益班基金佬？

個MPF又唔可以做定期，一定要投資落基金，你都識講基金有蝕有賺啦，我蝕左咪一樣無錢養老！？

都唔知邊個用pat pat諗野，諗埋啲咁既野出黎！

個MPF真係好唔得，點解香港無乜人反對架！

－－－－－－－－－－－－－－－－－－－－－－－－－－
再講間公司真係計到盡，黎緊4月有復活節假，佢計到啲員工last day係復活節假期之前個日。真係絶！

－－－－－－－－－－－－－－－－－－－－－－－－－－－
同樣程況其實都發生過係我身上，話說當年第一份工喎。
做左差不多一年辭職啦，老闆就話不如等佢請到人我先走，個時我唔識同佢地講條件（真係好蠢）。
咁結果真係同佢做到請到人，handover哂，佢一個屈尾十就叫我第二日唔洗返工，而家諗起佢應該係有違勞工法例架喎，好應該要一個月通知我架喎，有乜理由一日通知，今次件事我覺得我蠢哂，而家諗起都有啲激氣！

－－－－－－－－－－－－－－－－－－－－－－－－－－－

努力啲啦！

最近在Youtube 裡追看一套紀錄片，叫做 "UP Series"，是紀錄一群小朋友，由他們七歲開始，每七年訪問他們一次，紀錄他們成長中不同的階段。我在看的那輯是"56up"，他們個個都已經由7歲小朋友變成56歲的老人家，看這個節目就好像看著每個人的一生。

在網上見到有人話如果由7歲特輯開始看，會更加投入同更能了解受訪者的感受喎，等我遲些都搵來看看先。

入面最深印象是Neil ，他的轉變最大。他在二三十歲的時候窮到流落街頭，但到四五十歲時，突然成為了一個議員，雖然不是太清楚中間發生什麼事，但能有這麼大的改變，實在佩服他的毅力。不過有少少可惜的是，最終Neil都是不快樂，他說是因找不到其他工作，才做議員（但明明在之前訪問說從政是他是志願），他的夢想是要做一個作家。

還有的是上等人真的是有優勢的，片中有三位富有小朋友，他們在七歲時已被安排入讀名校，受訪時既問答就已經有人教路。



(我當時係youtube到搵到，仲有中文字幕，不過搵唔返。。。。。）


今日睇區家麟的blog: http://aukalun.blogspot.hk/（區家麟個Blog有好多好有意思的文章，強烈推介給大家。），其中一篇講運氣，講一個人的成功，或多或少都是因為運氣，但最緊要的是你要努力裝備自己，等有好運到時都識把握。

我都好想努力裝備自己，但我自覺自己又真係好懶，點先可以叫自己勤力啲呀！？

新年喜喜喜四日假

恭喜發財, 祝大家身體健康!!

一連放四日假

年三十晚
夜晚晚去左行維園花巿, 我地都已經成一點鐘先入到去, 但都逼到痴左線, 人貼人個隻, 咁結果梗係乜都睇唔到啦!
不過好搞笑, 係花巿買左個地拖, 個Sales 真係好識sell, 講到好好, 咁100元都可以試下既 :)

年初一
梗係拜年啦, 班細路拎左我部電話去打機, 仲要打到勁興奮, 真係好誇張。
佢地本身都有IPAD架, 見佢地睇既節目, 我心都寒埋
佢地而家睇緊普通話既兒童節目....
對於我呢啲唔識講普通話既人, 真係覺得佢地好上進!

夜晚就留在係屋企睇左套西班牙片...個名好似叫『我的美麗XX』, 睇睇下又幾好睇喎~得閒講下先。

年初二
去左冬日嘉年華, 每位$125, 包10個金幣。本身無諗住自己咁鐘意玩攤位, 哈哈, 玩開有條路, 玩得勁開心, 仲好想換多啲金幣玩, 不過成$10一個金幣，實在太貴喇！下次去冒險樂園玩啦！

入去玩其實係想影下相，因為好少見咁大型既活動係香港，不過最後太夜，又無乜影到相喎，拍左個少少video，遲啲放出黎比大家睇下。

冬日嘉年華出面係摩天輪。。。不過個摩天輪啲燈有啲唔識著，點解咁快壞架！

年初三
好晏起身，不過都入左長洲。好好彩咁啱有快船，都幾貴架，成$40一程，但就真係好快，半個鐘就到喇！
入到去人山人海，勁勁多人。
原來長洲初一至三又係會有小販出動架～有一檔賣壽司，啲壽司無雪住架喎，我地本來諗應該無乜人食既啫，點知。。。。都有唔少喎！

年初四
係屋企hea啦！睇埋＂選戰＂，都真係幾好睇，係有幾處地方我覺得有啲唔合理啫！
可能今日臨近返工日子，反而都唔知自己做得乜，結果乜都無做><

－－－－－－－－－－－－－－－
就係咁一連四日既假完結喇。。。

要等復活節喇～

剝牙記

痛痛痛......

聽好多人話剝智慧齒唔痛

不過應該係睇你隻牙生成點既

琴晚去左剝兩隻><

右邊個隻唔痛架

但左邊個隻好痛呀

痛到要搵冰敷

今朝勁唔想返工

不過最近請得太多Sick Leave

所以就照返啦

希望快啲唔痛啦

我想羊年健健康康架嘛!!

講番搵牙醫, 最初搵個個要收我$3000剝兩隻....

我見咁貴就去格下價啦

問過幾間都話要睇下隻牙點先知收幾多錢

咁結果揀左間網上話抵既

叫陳以昇牙醫, 係深水埗架,

個度有幾個牙醫, 我無揀到牙醫,

咁我個個應該係JUNIOR啲既

就收左我$2000~~~

哈哈..慳返一千^^

小病是福!!?

俗語有云, 小病是福....

不過呢....我也有太多病痛喇....

可唔可以stop一下!!

就快羊年喇,

我只想身體健康!!!!!!

楊千嬅演唱會

嘩嘩嘩, 琴晚真係好HIGH, 睇完千嬅演唱會真係好興奮!!

本來對千嬅既熱愛程度已經少左好多, 但係今次個演唱會真係喚回我好多好多少時回憶呀!!

唱左好多估唔到佢唱既歌, 好似出埃及記、E715342、因為所以, 嘩諗返起個時我仲係細路一名渣!!

不得不讚千嬅唱功又進步左喇！

今次個嘉賓係郭富城, 當然無陳奕迅咁好啦, 但係點都好過容祖祖既!

郭富城一出, 成個場勁HIGH, 氣氛超好, 城城你係得既!

睇完後, 仲好想睇多場, 仲想睇埋尾場, 可惜已經無哂飛喇><!

（題外話：今次大會螢幕有delay，搞到佢好似咪咀咁
---------------------------------------------------------------------------

不過今日係網上睇到篇話千嬅既文章, 大致上係講話千嬅唱得普通, 樣又普通,乜都普通, 但係佢有好多好既幕後人員幫佢, 所以就成到名。

我真係要話比寫呢篇文既作者聽, 諗野唔好咁片面。 搵個五音不全既, 又成唔成到名呀?  千嬅唱歌技巧唔算好高, 但你如果聽歌淨係聽技巧, 咁你聽電腦唱就得, 個啲包保上幾多個八度都得架! 但千嬅既可貴之處係佢點樣投放感情落去啲歌度嘛！

仲有呀，佢自己既努力呢？你真係以為求其唱下歌就得呀？佢咁多年不斷出show、上電視、拍電影、練歌、練舞、錄音、做訪問。。。。



(相後補)

佐敦谷

最近執緊相..... 唔係retouch啲相...係reorganize, 睇返好多以前既相，發現好多相都影得唔靚之餘，同埋好多影完無寫低，真係唔知乜事，搞到我突然好想好想寫多啲啲ＢＬＯＧ！！

－－－－－－－－－－－－－－－－－－－－－－－

剛剛過左去既星期日, 我無端端....行左個小山.....

話說朋友們約左去佐敦谷公園, 由於我遲啲到就自己去啦, 諗住慳啲, 唔搭的士啦!

係GOOGLE查佐敦谷, 咪跟住行啦! 

一開始仲要行條長樓梯上斜, 行到我索哂氣

行行行, 行左成半個鐘, 終於去到啦, 點知.......入到去點解見唔到個草園既????

只係得幾丁菲菲係度野餐...WTF...我去左邊呀!

打電話搵人求救啦

佢話比我知我去錯地方!!

吓...Google Map扇我!!??

原來有兩個佐敦谷!!!一個係公園, 一個係遊樂場, 仲要兩個咁X近!!

結果...我無力喇!

都係搭的士去喇!

大家黎睇下兩個地方.....幾似樣!!

-----------------------------------------------------------------------------------------

有日行過見到打小人都有得扭蛋.......

我無抽到小人....抽到呢個..HAHHAA 點解你可以咁樣衰架!! (太細隻又唔穩.....OUTFO添)

有日係惠X見到有雷神朱古力喎~~~見台灣啲人話好好味, 我梗係買黎試下

真係真係好好味, 我超鐘意食!!! 可惜再返轉頭, 已經無得買喇!!

我是歌手

今朝食左個好難食既白麵包, 大家千祈唔好買!!! 又硬啲味又乾味道又差!!

呢隻係嘉頓輕怡三文治包, 唔好唔好買呀!!

-----------------------------------------------------------------------------
我是歌手, 本來係一個好好既節目, 不過佢好多都係造假, 觀眾係假既, 咁即係分數都係假啦.....

由於唔鐘意造假節目.....之前都無乜點睇

不過最近係面書度聽到陳潔儀首《心如刀割》, 我覺得實在太好聽喇, 但係咁都輸左...唔忿氣,
上網去睇埋其他歌手係點, 睇完都係覺得陳潔儀無理由係包尾架!!!!

係睇既時候, 又發現內地又真係好鬼多唱得好既人, 韓紅(雖然我麻麻地佢人品) , 但唱歌又真係好得喎!! 如果香港多啲咁既歌手, 就唔洗好似而家咁一池死水啦!!



----------------------------------------------------------------------------

呢幾日, 我仲追緊個旅遊BLOG, 一個叫丹尼爾既青年人, 隻身由香港踩單車去英國, 真係好鬼堅同熱血!!
我而家睇到五十幾日渣, 真係好鬼好睇, 好好佩服佢既勇氣呀!!
自己一個踩單車喎, 比著我就驚遇到賊呀, 炒車呀, 身體唔舒服喇!!

http://blog.ulifestyle.com.hk/blogger/danielthewanderer/2014/06/29/

我從佢FB得知佢而家係中東, 好想快啲追完佢個BLOG呀~~

-------------------------------------------------------------------------------

2015 我要健健康康

真係唔寫開就無寫....

話說已經踏入左2015年， 送一個我自己拍既Time lapse比大家，今次呢個係短版，我希望遲啲可以整個加長版比大家！！

係度祝大家2015年，
健健康康！！
心想事成！！

 

而我自己2015年願望,
1. 身體健康!! (因為2014年係咁病, 病到我都無哂MOOD做其他野><)
2. 轉工 , 講左N咁多年, 再唔轉真係後悔莫及喇!)
3. 可以勇敢啲, 好似千嬅咁勇字當頭, 唔好咁多顧慮!
4. 講野叻啲, 唔知點解, 我好似人越大, 越唔識講野。

如果呢一年做到呢4個願望, 就已經好叻叻喇!!!

X Japan-林老板Yoshiki

前幾天林老板生日，轉下眼他都已經4x歲了，好難想像他年老時候的樣貌。

先送上令我遇見林老板既video比大家睇下, 當年就係因為在youtube上找鼓solo, 結果遇上林老板....




最近走去八掛了林老板的歷史，X Japan在1998年已經解散，咁究竟係1998-2007年之間，林老板係以什麼為生，我覺得簡直係一個謎。

話說當時林老板整左隊violet uk，都出左好似大約3,4首歌曲，而佢曾經講過話已經整好大約160分鐘既音樂，以雙CD形式出，當時好似係2005年，仲好似已經有埋出碟日期，但結果唔知因為什麼原因，到今年仲未見隻碟出現。

林老板唔出碟既原因多數都係佢對音樂有唔滿意，但雖然係咁，但要歌迷等成十幾年會唔會太誇張了！？雖然我對佢有咁崇高既堅持，可以視錢財如米田共，我好佩服！但我又好驚佢究竟係咪走入左個死胡同呢？因為原來好多古時既音樂人，都會寫歌寫到神經衰弱。。。

而時至今日，佢又話會係明年完成X的大碟，但對於下年我可唔可以買到呢隻大碟，我真係好有保留。。。

雖然以上好似係佢既缺點，不過又係佢既優點，真係令人又愛又恨。。。我好欣賞佢唔會理其他人既眼光，佢覺得正確就會做，同埋佢一決定做，就會想盡方法去實踐，佢既堅持令我好佩服佢！

近況-十一月

由於最近勤於追星.......所以好耐無update個Blog喇!!

話說因為發現祖國有很多偉大的懂翻譯的Fans，將他們的新聞呀，Blog等等翻譯，而他們也實在出道得太耐，有海量資料。。。我結果成日走上去八掛八掛!

另外，我係IVE報既course，終於開課喇。。
真係一拖再拖，課程都幾好玩，不過由本來一星期一堂變左做一星期兩堂，實在有些吃力喇！而IVE既admin混亂到不得了,真係唔明佢收左咁多錢,但啲職員可以咁HEA....
不過呢, 因為我最近掛住追星...........實在太懶散喇, 係時候要努力啲先得啦!!

另一方面, 我由試完中醫之後,而家又轉去睇西醫, 今次終於搵左個專科睇喇,雖然好貴,但希望可以快啲好番!

而家諗返起, 睇左咁多次郭醫生都同我唔夾, 我諗我都係要轉醫生喇!! 可惜我屋企附近啲醫生, 個個都好似麻麻地, 要努力做下research先得!

係呢段空檔入面, 我睇左《Gone Girl》同《麥嘜》, 兩套都好好睇, 套Gone Girl個女主角真係好恐怖, 最恐怖係最後大家都要依附住大家, Oh my god.....
《麥嘜》就一如過往,都係超感人!

好嬲

我今日真係好嬲, 好火, 好憤怒!

警察清場咪清場囉,

點解要拉人去暗角, 跟住係咁打人踢人,

個示威者都已經無反抗能力, 警察咁做係濫用暴力, 係私刑黎囉!

咁即係第時警察只要有懷疑, 咁乜人都打得架喇!

點解仲有人會覺得警察咁做係啱既, 仲會話警察打得好!

你可以唔認同示威者既示威方法, 但而家係警察使用暴力, 係良知既問題!



我仲有好多問題，

點解梁振英收五千萬，大家仲可以話無問題!

點解黑社會可以咁肆無忌憚, 明目張膽?

中秋節快樂

各位

中秋節快樂~

人月兩團圓~~

健健康康~

入差館

星期六入左差館走一轉.......

人生第一次入差館.....

不過放心， 今次入去係喜事黎既...

話說我星期五的起心肝走去跑步，仲用左個新袋袋住啲身份証、錢同電話，點知自己一時大懞，竟然無拉哂拉錬，跌左張身份証。。。。

我雖然即刻沿路搵，不過都係搵唔到，咁我惟有報失啦，原來而家有得上網報案，跟住仲book埋補領服務。

係我萬年俱灰既時候。。。。。就係呢個時候，收到警察局既電話話執到我既身份証，實在太幸運喇！

結果我星期六就去左差館拎返我張身份証 :)

PS:講番轉頭。。。當時我要開電腦上網報案既時候，部電腦竟然開唔到，令我雙重打擊，好彩重開左N次後，開得返！

電腦呀電腦，雖然我買左新電腦，但係我仍然會用你架，你要長命百歲！

近況八月

成日都想寫多少少日記，結果呢。。。。。大家有目共睹啦。。

近況就係。。又大一歲，今年只係想健健康康喇！今年真係好多病痛，好陰功，究竟我係搵錯醫生，定係定係。。。

最近我又去試下中醫喇，如果呢個中醫都唔得，就惟有去睇專科啦！

今次個中醫好好人，好有心機聽我講症狀，不過我又有啲黑仔喎，因為撞正中醫師放大假，要隔成兩個禮拜先有得再睇。。。希望醫師可以醫好我啦！

－－－－－－－－－－－－－－－－－

最近賣走左部大相機，買返部細相機，賣走大相機時有個奇遇。
話說我放左部相機去DCfever網，好快就有買家1號同我whats app，好似好順攤，約好交收地點同時間。好啦，去到交收地點，打電話比佢，佢就話係佢朋友來交收。

點知原來佢個朋友，簡稱買家2號，原來係內地人。買家2號完全無上過個網睇我個description，出到黎係咁話好舊，要減價，又話唔要我支閃光燈，我即刻好鬼嬲，

一來我係諗住相機同閃光燈一齊買，先同佢交收架嘛！
二來我係description度寫明唔可以出黎先議價架嘛！
三來我唔明點解買家一號唔講哂所有資料比買家2號聽囉，而家搞到我拎哂啲野出黎同佢彊持！

呸！結果我地拉址左成十幾廿分鐘，我嬲嬲地執野走啦，佢又話咁減一百啦，我都頂唔順佢，結果我都係減左一百元賣比佢！
－－－－－－－－－－－－－－－－－－－

除左賣走左部相機，仲賣走左啲好耐無睇既書。我之前都有試過免費送出，不過呢好似越來越多人拎啲免費書去賣，所以而家我會低價出售，咁我諗願意出錢買書既都應該係愛書人啦！
－－－－－－－－－－－－－－－－－－－－－

最近我都有時睇下TVB既沒女，我其實有啲懷疑佢係咪真架？我最覺得奇怪係見佢地啲教練成日好惡咁話啲沒女，啲沒女又爆喊，乜咁樣真係可以輔導到人架？同埋佢地係咁鬧人，有啲心靈碎弱啲，會唔會做傻事架。。。。
其實呢我睇過日本既減肥節目，人地健康好多，又唔會係咁踩啲肥妹，唔會突登搞喊人地，乜真係好多香港人鐘意睇人仆街咩？
－－－－－－－－－－－－－－－－－－－－－－－－－－－－－－－

Banana

有日係超巿買左一梳青色既蕉返黎，

諗住未熟啦，

就放左係度等佢變黃．．．．

點知，

原來呢梳蕉係青蕉，

青色係佢最靚仔既時候，

放到變黃既時候佢已經係就黎爛

orz..