連放三日，真係眨下眼就過，本來計劃要做的，當然無做到。（好似每個假期都係咁）
唉，最近好懶。真係要食番粒勤力藥先得！（有冇人知係邊度有得買）
放左三日假，都有做少少建樹的活動。
放假第一日就走左去清水灣沙灘，要搭巴士到鑽石山再轉91號巴士，都差不多成個半鐘先入到去，入到去太陽都開始落山喇！我地都係玩下水，玩下沙，同同隻playmobil影下相（遲啲再放相上黎），就返歸喇！今次無帶沙灘蓆去呀，無得攤起度，下次要帶埋去hea 下先得！
不過呢，玩完走去搭巴士既時候，條樓梯對我黎講實在太長喇，上到去巴士站既然覺得暈暈地。。。
眼見我連條樓梯都唔夠氣上，第二日傍晚我走左去跑步，我諗我對上一次跑步已係好多好多年前喇，一直提唔起心肝做運動，今次見放假就試下跑啦！
今次係跟一個叫"C25K"app 跑，行2分鐘跑1分鐘，都算完成哂成個課程，不過完個刻覺得暈暈地，都係要快啲加強我既體魄先得，我仲有好多野想做！
不過呢，唔係放假既時候，真係好難抽到時間去做運動，食完飯後要等成一至兩個鐘先可以做運動，咁都夜啦；但如果放工即刻去跑又肚餓，返返下工又好難食個Tea，真係諗到頭都爆，個apps話一個星期要跑三晚，真係好難呀！
放假除左做下啲有益身心活動外，仲睇左好多電視，最近睇緊韓國綜藝"花漾爺爺"，而家認到個幾位主角後，都覺得幾好睇，睇住佢地周圍去旅行，我都好想好想去旅行呀！
星期二
放完假返黎都係遊魂居多，因為我想跟住個跑步app既訓練，所以諗住今晚又去跑步。
但係放工跑步，時間真好尷尬，結果我放工食左兩個包，跟住諗住抖一個鐘去跑步啦，點知到七點幾時又覺得好肚餓，我又食多少少個包，跟住8點去跑步，好難先可以空肚一個鐘去跑步，下次要再諗諗計。
今次跑+行左20分鐘，仲少過上次，不過我要求好低架渣，總知有去做運動都OK啦！今次膝頭有少少痛，我係度諗係咪我對波鞋唔啱跑步，我又好想買過對鞋喇！
星期四
有免費飛，去左睇《Z風暴》，我覺得係睇緊明星版的廉政風暴，故事都預料之內，所以有少少悶悶地！
星期五
終於又放假喇！今日放工走左去買對跑鞋，哈哈，因為見到原價8xx 減到5xx好抵呀，就即刻買左，希望可以跑爛呢對鞋！！
好sharp既紅色:)
本來仲買左件運動衫，可惜可惜係我買細左一個碼。。。。（我承認係我懶得去試）
星期六
夜晚去食以前好鐘意既和亭。唉，呢度既食物縮哂水，個和亭沙律，得幾條0.5cm粗既三文魚，真係呃錢，跟住個壽司山，比我地見到有頭髮，叫個侍應換仲係度講話邊個啲頭髮，好似講到啲頭髮係我地跌落去咁，頂！
每人消費都要一百元，我覺得丼丼屋好食好多喇！
行街又買左個Tote Bag，orz。。今個月洗左好多錢呀！
星期日
今日落左銅鑼灣，買palymobil，哈哈！
成日想學好啲英文，今日問左個星級英文老師價錢，聽完真係嚇親，成千幾元一個鐘，究竟要月入幾多錢先捨得咁樣學英文。。。
沒有留言:
發佈留言