Day2.2 大阪遊記2015--梅田KiddyLand+道頓堀

哈哈，係咪好奇怪，轉眼間就黃昏！？　

其實係返完酒店，食完個lunch就過黎架喇！

我黎到梅田，第一站就去左KIDDYLAND，即係專賣玩具既地方，當時仲因為要幫個朋友買野（個朋友諗左好耐，我以後都唔會用咁多時間幫朋友買野呀）。

其實梅田都有好多野睇，有個空中庭園展望台（強烈建議如果好天，大家一定要去，我見我朋友啲相好正架），仲有摩天輪搭！

不過全部都同我無緣呀，下次我一定要留多啲時間去梅田！

呢間咁大既百貨公司，我都上左去睇左一陣架

好，睇下當日我睇左乜野玩具

KiddyLand 地址:梅田阪急三番北館1F

呢隻我無記錯係SNOOPY個阿哥, 肥肥地好得意, 我都買左呢隻公仔細版返屋企

呢個幫另一個朋友買, 影相比佢揀既, 結果買左上面個款, 朋友勁鐘意

不過呢, 價錢唔平, 但個內膽個袋竟然唔係用布整, 係用不織布整, 朋友話好快就爛左個內膽喇!

JACKIE'S都係我至愛, 不過無睇中野呀

仲有美少女

我好鐘意飲日本既朱古力奶，好滑

跟住就返去難波, 我唔記得呢間係乜野百貨公司, 不過大家經過, 又鐘意hello kitty既話, 記得入去, 遊客可以申請張遊客卡, 買野平少少架

我見時間都夜, 自己都買左個炸豬扒三文治, 不過味道好普通

點解人地啲街景咁靚既?

跟住我再買呢個芝士蛋糕 (雖然而家香港都有得食), 排左一陣隊啦, 都幾多人架!

就黎聖誕節, 包裝都唔同

連個印都唔同

食完就去道頓堀

呢度好旺, 好靚!

咁我見到咁平餃子無理由唔食啦, 香港都無咁平! 同埋好平, 我好鐘意食

呢個公仔而家好似換左喇

我遲左一步, 買唔到呢間既芝士tart，不過後來終於係東京食到，但係涷既，即刻好失望！

跟住，就係到我最愛既激安之殿堂

成間店都係香港人，好好笑！

今日既戰利品，都唔係好誇張啫

一拎起就覺得啲回憶返哂黎 -- 郭富城

屋企長期無位, 所以成日會諗下有乜唔要可以慳番啲位。

見到已經好耐無郁過既CD，於是就睇下有乜捨得唔要。不過你問我捨唔捨得，咁梗係唔算好捨得，不過奈何屋企無位之餘，啲碟又起碼十年無人拎過出黎聽，好應該為佢地搵返個好主人。

由於我覺得啲碟仲聽得，唔係垃圾，所以就無就咁扔，但身邊朋友又無人要，就放左上網賣喇！

其實我放左都好一段時間，琴日竟然有人話要哂，不過就問個價錢可唔可以平啲。其實我都唔知巿價係點，但我見有人可以幫我搞惦呢批碟，我比左個好平既價錢佢！

（其實係我心裡面，以為無人再聽郭富城架喇）

呢啲就係我賣既碟

當年鐘意郭富城，主因鐘意佢跳舞同埋靚仔啦，你睇下下面張封面相，影得佢幾憂鬱，呢個封面相我超鐘意！

呢輯都好型，變左歐洲佬

我最鐘意係呢隻碟，一變傾城同這夜心情都好鐘意！

佢有輯相係冬菇頭，我覺得好好笑

初出道既郭富城，真係好型又靚仔

話說因為要檢查下啲碟有冇事，咁我就放落電腦聽下。

諗住播返以前好鐘意既歌，結果我而家聽返覺得好難聽，聽左一半就熄左。。。（點會咁架。。。）

好啦，ByeBye啦，我既童年！

PS: 不過上網賣野都有激氣事, 好似寫明旺角交收, 啲人仲會問可唔可以九龍塘交收; 又或者明明有啲買家明明唔夠人快, 就會試圖出高價引誘你賣比佢, 唔賣佢又會發你脾氣.......

當然仲有啲BID左唔覆呀等等啦

Day 2.1 大阪之一個人的浪漫 2015/12月--黑門巿場

今日都成十點左右先起身, 因為琴晚搞得實在太夜喇。

朝早就可以周圍睇下酒店附近係點喇, 附近原來係賣煮食用品同傢具，酒店同黑門巿場好近，大約10分鐘就到喇!

酒店周圍有啲好得意既宣傳畫

好，到左黑門巿場喇，呢度都幾似街巿架，咁有賣魚生、生果、海膽、和牛等等

係啲商業地方，有咁大個地方，唔洗錢比你休息，係香港真係未見過！！

而家睇返相，我好想個海膽呀，我個時點解會唔買架！！

我買左呢個做早午餐，味道其實無乜特別呀，可能呢隻太平喇，如果想食啲同平時唔同既牛，一係買返隻貴啲，一係不如慳返唔好食。

即場鐵板燒

個樣都呃得下人架

當時應該士多啤梨當造，勁多士多啤梨，我都買左盒，不過我梗係買啲平平地呢，買左幾百丹個啲

仲見到有盒好得意既壽司，買左盒返酒店試下，但唔好食呀。。。

食飽飽就準備去梅田喇

Tom N Toms Coffee -- 幾好食

話說我睇中左呢間好耐, 但要搵到人肯同我食啲咁肥既野真係有啲難。

今次鐘意求到小宅同我食喇!!

不過去到有啲O嘴, 點解成間店得4個位....一張有人食緊啦, 另一張枱比啲等緊隔離食店既人坐住, 咁我地唯有叫佢起身比我地坐啦!

價錢都算OK, 多士加飲品 $70

我地叫左最eye-catching既蜂蜜奶油多士同柚子梳打汽水。

最初都驚個多士好漏, 點知個味道唔錯喎, 塊多士甜得黎唔漏, 又唔太硬, 好味過teawood個塊勁多, 奶油打得好有空氣感 (哈哈, 希望大家明我意思), 兩樣東西好夾, 而家諗起都好想食!

梳打就無乜特別喇

大家經過都可以黎食個TEA呀!

睇左唔知幾耐既－－－簡.愛

有人話如果唔知睇乜書，就睇經典名著，一定唔會浪費左啲時間去啲爛書度。

而今次睇返19世紀既呢本書，我又真係有呢個感覺，好睇，唔覺過時。

如果想做編劇／作家既朋友，呢本書一定對你地有啟發

對我最深印象係作者既敢言，當年（成18XX年），一個無現時社會咁言論自由，而作者就書入面講左時下基督教／信徒既問題。

書入面，簡愛小時候入左間寄宿學校，可惜間學校個神父虛有其名，只係識得為自己貪圖財苦，一點同理心都沒有，完全不理會孤兒院的兒童不夠食物及食物，還亂拋金句，好彩既係來有人揭發左神父既惡行。

另外，牧師表哥認為自己的想法就等於神的想法，不跟從他的說話，就是偏離上帝的旨意，最令我意外的是為何他可以認為為了服侍神，可以娶一個自己不愛的人，難道這不是假結婚，不會落地獄嗎 ？當然到今天仍然很多人覺得自己受到蒙召，然後用動人的說話技巧令其他人追隨他，就算像簡愛般擁有強大自我意志的她都差點兒因為表哥的靈巧舌頭被迫去了印度。

而另外令我驚奇的是原來當年基督教是不可以離婚的，但真的不知為何現在卻沒有了這規例，令我覺得好似龍門任他們攞的感覺。

其實作者想講權威未必一定啱，要有自己獨立思想，如果你係基督徒就好應該睇哂成本聖經。與此同時，政府講既野都未必啱，因為始終法律都係人訂啦。

本書內容豐富，不斷引你睇落去，由最初想睇下小時候既簡愛點樣逃離可憐既命運，到中期就會想知佢工作既地桑費爾德莊園方有乜野秘密，最後當然想知佢既愛情係點，總之就令你好想追落去。

**********
題外話

自己用左以月計既時候，終於睇完呢本書。點解無端端睇呢本書？話說有一日去圖書館，見到呢本書，個時又想學下英文，就諗住中英文一齊睇點都學到啲英文吖，最初個十幾頁都好似有KEEP住睇下英文跟住睇中文，但之後實在頂唔順，我覺得啲英文好深呀，結果就完全睇中文。

圖書館既書最多只係借十個星期，咁我到還書都未睇完，本來想上網睇，但網上只有國內翻譯，譯得好怪，而呢本台灣譯本想買都買唔到，結果我就每次還完後，隔一陣再去圖書館搵呢本書，又好好彩呢本書次次都無人借，結果我好似借左成三十個星期先睇完。。。。。

我其實淨係識講好睇，咁大個人都唔係好識寫讀後感....

好味清靜的Yadllie Plate--韓式炸雞

前一排唔知係咪睇得太多韓劇的關係，成日都想食炸雞，結果有一日搵左呢間炸雞店試下。

上到去，超少人呀，唔洗等位直入。

入面裝修幾靚，又因為無乜人，靜靜地，食得黎好開心！

我地得２個人，所以叫左好少野，一個沙律同一個炸雞。

炸雞都幾好味，有得揀兩種味，有隻好辣，我食唔到，比哂我個朋友食，個薯條好好味，好味過麥記既多十倍。

沙律就無乜持別啦！ＨＥＨＥ大盤啲就仲好啦！

因為太辣，叫左野飲，我覺得個杯好靚呀，佢係成罐汽水比你自己倒入個杯到架，所以都算幾抵吖。

果日好似唔知過左幾多點，就８５折，我記得好似埋單價$300左右啦！都算幾抵架！

不過有樣野想講下，就係啲侍應都好似幾唔想睬你咁，明明無乜客，但就係唔多理你囉！

而家去開飯度睇，星期一至五十點後仲有五折添，超抵！不過間野咁少客，唔知捱到幾耐呢。。。

－－－－－
終於開始想寫番BLOG, 希望Keep 住Keep住!!