我自己睇得最完整的是選戰，來生不做香港人，而開台劇警戒線、我阿媽係黑玫瑰又或第二人生都只是看過一點點。
HKTV配件夠，技術夠，但劇本始終差啲！
我睇過幾套，都覺得虎頭蛇尾，個頭開得好好，但到尾段就好似唔識結尾咁，求其結尾。
好似來生不做香港人，最後張可頤被懷疑殺人，套劇主線講港人同內地人矛盾，但個高潮位既然同個主線無乜關係，仲要一拖拖咁耐，而我覺得最好笑係張可頤男友被槍擊個幕，明明套劇開頭都拍得唔錯，但無端端結尾變左普通師奶劇。
再講我睇第二人生大結局時（這套只看了大結局），音樂比賽中，主角們的樂隊在準決賽唱的歌曲既然是Beyond的歌，大佬，1.樂隊講求原創，你唔係普通參加歌唱比賽呀，點會唱Beyond歌，就算唱都改篇下先。2.我想講Beyond雖然是神，但實在太多太多時候唱佢地啲歌，實在唱到有點爛！（就好似逢遊行時實唱海濶天空一樣）
如果HKTV做既題材只係同無記一樣，都係啲警匪、戀愛師奶劇、專業人物愛情劇等，真係好難會令睇開無記既人轉台去睇HKTV，因為佢地唔會理個啲乜野畫面、燈光、攝影角度，佢地只係鐘意就手，總之無記比乜佢地就食乜啦！
佢地最鐘意講既就係返工已經咁累喇，做乜睇電視都要諗野喎！
HKTV好應該做啲無記唔做既題材，好似選戰同導火新聞線咁，咁樣先會吸引到一班平時唔睇電視既人去追看。（觀乎觀眾反應，HKTV都係呢兩套比較多啲人睇）
我都明當初佢地可能諗住係電視播，所以先會拍左啲咁既劇，不過我覺得佢地就算係電視播，收視都會係麻麻！
不過HKTV都有值得讚既地方，畫面係靚過無線既好多。Technical 啲講，你睇下佢啲景深，就知佢部攝錄機幾Top，再講佢既打燈真係靚好多，唔係度度都係世界光，而係參考返真實既狀況黎打燈，仲有好多都係實景拍攝，質素真係高幾班。
好似醫院景咁，無線既話一定係廠景加世界光，你係畫面到見唔到乜係亮點。但係HKTV就實景，安排角色係個窗邊，滲啲自然光，有少少自然光射落角色度，再加上個主角戴住頂紅色帽，觀眾自自然然放個眼光落個角色度。
呢場又係做得好靚，側光大光圈，智叔最sharp，矇矇地見到佢啲下屬既表情。
講左咁多，其實都只係希望HKTV可以繼續生存，繼續做啲好電視劇俾我地睇！
我唔想見到佢地咁有誠意既製作，因為少少既問題而無得繼續！
最後真係希望各位，可以既話就上去佢官網睇啦！
唔好DOWNLOAD啦！
比啲支持佢地啦！
下次等我講下選戰套劇！
沒有留言:
發佈留言