昨夜淩晨，我坐上了去大埔的紅Van

嘩，個戲名長到憑記憶真係好難記得到！

之前宣傳得咁勁，香港電影加陳果再加上Shine，無理由唔入戲院捧場！

套戲比好多人插，不過我覺得還可以，條橋實在太正，好難唔想追落去。

（以下有劇透）

今次套戲相當懸疑，故事就由突然間全世界上只剩下一架小巴同小巴上的司機及乘客開始，跟著這十七個人就不斷尋找其他人的消失的原因。

套戲有些位是有些突兀，好像中間眾人用刀插MK仔個幕，可能班演員演技有限，我覺得個幕好奇怪。

最尾個幕紅Van被人追殺，好誇張，架Van仔係咁被其他車撞都仲上到山。今次套戲是無結局，因為係有下集。

套戲無結局，好吊癮。結果我就以極速看完網上版小說。

個故事真係寫得好好，不過個結局呢，就好像有些爛尾，又或者可能太高深，我有啲部份都係唔明！

有興趣的話，大家都可以係呢度睇

https://docs.google.com/document/d/1sakbP87NfgwgXAZoDcJ0Y2VmlQCJns41ALsS2b67G2s/edit?pli=1

2013 Christmas

平安夜返工，好surprise收到兩盒朱古力，多謝哂！！

夜晚就去左九華徑吉吉燒BBQ，＄200任食，都算幾多野食，呢度自己出去食物區夾食物，鐘意食幾多就拎幾多，我覺得好過小欖個BBQ場，小欖BBQ場係職員夾比你，有時想食少少就夾好多比你，浪費左啲食物。個日仲係朋友s既生日，不過我唱完生日歌就好快走左喇，因為燒到一半，有朋友唔舒服，所以早走返屋企先。

廿五日收到份好得意既聖誕禮物，好鐘意。下午去左睇『掃毒』，套戲有劉青雲、張嘉輝同古天樂，好難唔好睇，條橋唔錯，劉青雲要兩個揀一個，呢樣真係好慘，佢點做決定都會後悔，不過我覺得個ending就有唔合理，張嘉輝跌落鱷魚堆入面都冇死，仲要最後係間Bar入面，三個人打成隊軍隊，都可以打嬴，呢個結局我唔係好接受到。

Boxing Day同mark 6去左圓方MangoTree食high tea，食物係唔錯，不過下次我想食西式Tea，泰式感覺好似怪怪地。呢度坐得好舒服，最意想唔到係可以睇到日落。Juju越來越搞笑喇，小朋友無憂無慮成日傻笑，好得意。食完無隔兩個鐘就又去左食元氣喇，第一次以咁既組合去食壽司，今日發生左件搞笑事，就係無端端我地張枱黎左玉米壽司，呢類唔扺食既壽司平時我地係唔會叫架嘛，大家係度O哂咀既時候，我發現應該係我本來諗住叫玉子壽司，但剔既時候剔左玉米．．．

畫公仔+剪頭髮

記得細個都鐘意畫公仔架，不過我啲美術功課好低分，覺得自己冇天份，搞下搞下就對畫公仔完全冇興趣，仲覺得自己點畫都畫得唔會靚。

最近學緊設計，所以多左好多好多機會畫公仔，畫開左就有條癮，同埋叫做上左小小手，畫啲公仔無咁核突，咁又有返啲心機畫下。

上面兩個係我既自畫像，其實都唔係好似，一來我個時啲頭髮冇咁短，二來我冇咁瘦，不過卡通化嘛，咁梗係癮惡揚善啦！

黎緊希望keep住畫啦，畫多啲公仔比大家睇。

－－－－－－－－－－－－－－－－－－－－－－－－－－

之前去左剪頭髮，而家剪頭髮越黎越貴，成百六蚊一個頭。

今次剪完都係激鬼死人，因為我好唔鐘意個髮型。

入到去我就同個髮型師話話剪短剪碎，今次我錯在冇比幅相叫佢跟住剪，佢就自由發揮，剪到一半我就覺得唔對路，點剪到我兩邊咁短，佢見我個樣怪怪地，佢問我 "做乜呀？”；我話　"而家個頭好似頭盔呀”；佢就話"唔洗驚，而家都未剪完．．．"。

結果佢剪左個Monchhichi頭比我，OH NO!!咁我打死唔走叫佢再修下佢啦，我話而家好老土呀，佢無我符低下，再剪，最後就剪到勁頭同埋左右髮腳唔balance ．．．．點解會咁架！！

而家我淨係希望啲頭髮快啲長返，同埋下次如果比我遇到個心儀既髮型師，我會問佢拎卡片架喇，我唔希望我個頭再比人剪衰左呀！！！