星期日.不斷買不斷食

又破財，今日要去黃埔吉之島買傢俬（都唔明屋企細細點會有咁多傢俬買架），坐坐下車兩個人都話肚餓．．．結果去到紅磡就落車食左野先。

其實紅磡舊啲個邊好多好野食又平，得閒黎呢到行下都幾開心，不過個日好晏先去到就冇周圍行啦！

今次揀左呢間韓點，呢間係正宗韓國人開，之前上過電視就排哂長龍，而家無人排隊喇。舖入面有大約十個位比大家堂食。之前都有買過呢間泡菜返屋企食，食過覺得麻麻。今次再黎試過。

韓式紫菜卷－麻麻地好食

泡菜薄餅－呢個我覺得個味怪怪地。

至尊年糕－係有幾隻唔同味既年糕組合而成，最初拎到黎時，我仲以為係魚蛋，腸仔，真係低B，食落呢，其實隻隻都差唔多，呢個幾好味，不過越食越辣。

每人40幾元，都好抵，雖然味道麻麻，不過見佢咁抵可以再黎！地址係：紅磡寶其利街59-67號寶威大廈地下2號舖

食飽飽就繼續行街，途經紅磡759，超大間，今日仲要有7折，咁梗係入去8掛下，咁就買左成50元零食。

跟住去左紅磡德民街既卓悅買零食，行過呢度幾次都唔知入面有零食賣，係同事話我知，入到去發現原來超多零食賣架，價錢都合理，又唔似759咁迫，我好鐘意行！

不過可惜個收銀係個西人黎，真係激氣！

行完吉之島，就搭小巴出返佐敦又入多次759，可惜冇麵包蟹、又冇麥片，所以買左少少野就走左喇。

雖然唔係好肚餓，不過呢就口痕，結果入左糖水舖。

呢間糖水舖好特別架，有熟食叫架！

腸粉（＄１５）都幾貴，不過佢又幾好味喎，又夠熱，食唔停口！

紫菜鹽酥雞瓜（＄２９）－唔知係咪紫菜既關係，咸左啲呀！

黎呢度其實為左呢件Cake，係芒果層層疊，之前食過榴槤覺得好味道，所以再黎。

今次味道呢，都好味但同以前好似有啲唔同，咁我睇返舊相，之前每層之間係薄啲，咁可能個口感會好啲！

今次每人五十塊錢，間舖叫綿綿冰，地址係佐敦吳松街11號