Playground of Alika: 5月 2014

2014年5月28日星期三

香港仔

一直以來都很喜歡彭導的電影，鐘意他電影中的驚喜，那些看似奇怪但又合理的情節及他的幽默，那段反串的《別問我是誰》簡直讓我笑爆肚。

睇左彭導新戲《香港仔》，雖然仍然有一貫的幽默同奇情，但今次在故事推進及描述都略嫌不足，浪費了這麼大的卡士。

《香港仔》是一個溫情家庭倫理劇，劇集開始時先多線發展，描繪各個家庭成員的心結。開頭我覺得有一些混亂，幾個故事一齊講，故事又有些平淡，而結尾卻有些突兀，纏繞大家心入面既問題，好似眨下眼就能解決哂。好像Gigi始終都沒有向自己老公坦白，她的炸彈始終沒有拆下，如果日後古天樂知道了會有何反應？

每個人都可能會有個心結，好似灣仔地底隱藏的炸彈般，但如果你一日唔走去拆彈的話，到炸彈要爆的時候，死傷更加會嚴重。

2014年5月22日星期四

碎碎念近況--我要正能量

近況就是諸事不順，OK，我明白我絕對明白，有好多好多既人慘過我黑過我．．．

但係我都要呻下，呻完就去睇返套『行運一條龍』黎沖一沖喜！

究竟乜事？就係自年頭病左好幾次後，身體剛剛話好番左一點點，就到我部電腦病入膏芳，咁自己又衰，個back up超亂，都唔知有冇Backup齊，勁驚有啲資料會化為烏有，但無奈地部機都係要送入廠整，結果醫藥費千多元，電腦呀，唔該你生生性性，唔好再有事喇！

繼壞完電腦後，琴晚又有新野，就係上唔到網，你知我地呢啲病態網民，無得上網個心硬係囉囉攣，而家都唔知壞乜，今晚先Call netvigator 技術支援。

希望好快就搞惦，我唔想我囉囉攣幾日呀！！

2014年5月21日星期三

黃耀明太平山下演唱會2014

每次睇黃耀明演唱會都有少少失望，但我又每次都買飛，成日驚會miss左明哥精采的表演。

我其實只喜歡早期的明哥，在達明一派時期的、在《一一》時期的，之後的《窮風流》到近期的《太平山下》，我都只是覺得麻麻地。

我喜歡簡簡單單的明哥，現在的他是個很迷幻很重型電子的歌曲。

可能你會話以前達明一派都是電子音樂，不過呢我覺得達明一派的編曲相對來說無咁複雜，但現在明哥的編曲就好複雜，令到我感到有層隔模同佢既音樂。

講返個演唱會，個visual effect仍然好正，一開場見到個好靚既香港舊樓CG，真係好靚。

上半場主題係黃耀明自己既故事，由佢細細個開始講起，最鐘意就係睇佢細個啲相，但係呢部份唱得太多別人的舊歌，我接受唔到。（我鐘意啲歌手唱返自己歌多啲）

全晚明哥狀態一般，影響了演出，有時會唱到甩嘴。

中途唱《這麼遠，那麼近》有黃偉文出來講對白，本來應該好正既，但我隔離班師奶們卻覺得呢個係個笑位，不斷笑，又不斷叫Wyman個名，一首好歌就此被遭塌。

正如我上面所講，我真係麻麻地而家明歌的編曲，所以今次唱《你真偉大》同《一一》，我只覺得好嘈，無左以前既感動。

其實明哥把聲咁好聽，佢可唔可以再搞個不插電又或者做一個編曲簡單些的演唱會？

我只係想聽個簡簡單單的明哥演唱會，當然明哥想做一個有深層意思的演唱會都可以的，但始終明哥單飛的歌不像達明的歌般帶有政治性，做出來的效只有事倍功半，若真的想做有政治含意的表演，倒不如考慮做舞台劇。今次的演唱會，我只覺得力不從心，表達不到什麼深刻意思出來，又做不到一個唱到令人聽出耳油的演唱會出來。今次的演唱會，在我眼中就只是一個東一忽西一忽的演唱會吧了！

我好想聽到黃耀明唱以下幾首舊歌架，可惜今次仍然聽唔到。

《忽爾今夏》

《身外情》

《風月寶鑑》

《如果你愛我》

2014年5月19日星期一

Friend 過打Band

喂，一齊食飯吖！　　　　　好呀！

喂，一齊打波吖！　　　　　好呀！

喂，一齊睇演唱會啦！　　　吓．．．

喂，一齊去旅行吖！　　　　呀．．．．．．

Friend 還 friend ，有些事都要搵個夾到既朋友，先會好玩既。

好似睇演唱會咁，諗住大家都鐘意同一個歌手，一齊睇一定無問題，但奈何我曾經遇過以下既遭遇。

1.人肉卡啦OK機
朋友不斷在跟唱，我明白你首首都識唱，但係我比錢係想聽個歌手唱呀，而唔係想聽到你把聲不斷和唱呀，作為朋友見到你咁投入咁唱，又唔好意思打擾你，唉，我個$380蚊呀！

2.雞啄唔斷
朋友們不斷傾計，講是非，我都唔知點樣可以叫你地靜啲，結果傾到要前面個觀眾話你地嘈先靜左啲，仲走黎問我乜我地好嘈咩？其實咁大個人都應該明白，係演唱會入面，你係咁傾計，點都騷擾到人啦，既然都買左飛睇演唱會，不如專心啲睇啦

另一樣野就係旅行喇，去旅行大家朝見口晚見面咁多，磨擦實多架喎，同埋大家去旅行要求既野都唔同，真係好應該夾一夾先一齊去！

我就曾經遇過咁既問題

1. 的士狂熱
曾經有一個旅伴去邊都鐘意搭的士，我明好多人都係咁，的士方便嘛，但我自己其實鐘意搭下當地既巴士／地鐵等等，感受下當地人既生活。

2. 食環境定食地道
有些人食飯第一樣係食環境先，即係無裝修既小店，佢地係拒絕光顧。如果你剛巧係同佢地相反，食飯係睇味道同價錢先既，咁真係要諗清楚先好決定一齊去旅行！
我最經典既例子係台灣度小月，有食環境友人同我講覺得呢間超級超級好食，但我去到除左環境一流外，食物我真係唔識欣賞。

3. 訓覺習慣
基本上我是任何地方都可以睡的，但有些人要全黑環境才能睡；有些就要有燈才能睡，所以呢，如果你是難以入睡的朋友，去旅行之前最好和朋友溝通一下，不然變了隻熊貓回港就無謂啦！

4. 行邊先
有人鐘意睇古跡；有人鐘意睇衫，有人鐘意玩戶外活動，有人淨係鐘意影相，如果大家都無乜所謂梗係好啦，如果大家都有目的去既話，最好就溝通下啦！

5. 住好DD?
講完食梗係講住啦，有啲人去旅行係諗住極度享受，住既要五星級，要好Grand既酒店，但可能你自己只係求其有個乾淨訓得既床位就OK，Budget差好遠，真係要講清楚。

其實講咁多只係想講平時係香港玩得幾埋，幾friend都好，始終相見好同住難，平時係香港都只係飲飲食食，呢餐唔啱食你可以揀唔食，但去旅行就唔同，唔通你成個旅行都獨行俠咩！除非你份人好隨和，如果唔係同個唔合拍既人去旅行，可能返黎連朋友都無埋。

有時好朋友，又唔係話乜野都一齊做先叫好朋友架嘛～

那些年,返教會的回憶

今日係面書睇到呢段文字，突然令我諗返係我讀書時返教會既回憶。

不過講返回憶之前，講下最近佢地呢個廣告，當然佢地有錢點登都得啦(我絕對唔贊同佢地講既野)，我又好唔鐘意佢個電視廣告，係咁講話『一個家庭，一個爸爸一個媽媽無可取替』，我明佢地係想話反對同性結婚，但係我想話好多小朋友不是生長在完整家庭，如單親／父母再婚個啲睇到呢個廣告都可能會幾Hurt，個廣告好似不斷提醒呢啲小朋友佢地個家庭有缺陷，可能會令到佢地好自卑。

好，講番我以前返教會既生活，我中學係基督教，好自然就有同學帶我返教會，大大話話我返左三年，每個禮拜返兩至三日。

係個三年入面，我記憶最深係谷人數，每個禮拜我地既組長都會同我地講我地既人數目標（而家諗起好似銀行跑數咁），每個星期都有小組人數比賽，我地仲要逢星期三、五向組長報數，如果你連一個同學仔都帶唔到返教會，係會比組長鬧。所以我地每個禮拜都要好努力扯人返教會，我個時既朋友成日笑我，話逢星期三、五都會收到我電話，佢地話呢啲係追魂call。

最好笑係如果你所屬小組太少人，係會受到懲罰，好似會係球場跑圈又或者熱天無班房用，要露天聚會。

我諗你睇到呢度，都覺得間教會好奇怪，點解仲咁多人返，間教會有好合理化咁講點解要谷人數，佢話因為教徒的重要使命是傳福音，你越帶得多人返教會，就代表你有傳福音，遵照神的旨意。

現在回想個三年，我係教會入面係不斷搞活動，令聚會更加吸引，從而令更多人返教會。

但問題黎喇，就好似Benson所講，點解教會無走入社會？既然教會都已經可以號召到咁多教徒既時候，點解唔搞一啲真係幫助別人既活動，好似一些探訪老人、捐物資給有需要既人等等，我個三年來唯一一次所謂義務運動，係大掃除清潔教會場地，而其他時間就只是大家不斷在教會入面圍威喂，又或是不斷為教會祈禱及籌錢買新堂。

不是親身關懷社會，令他們感受到基督的愛，這樣更可以令更多人信基督嗎？

當教會不斷呼籲我們要愛鄰舍既時候，但卻叫我們不可以同那些離開了的教會朋友聯絡，不是話見到弟兄跌倒要扶佢一把的嗎？

當然可能只係我當年返個間教會先係咁，我都希望其他教會係有走入社會，而家諗起好耐以前既教會傳道係會派奶粉，雖然好似利誘人地，但始終都叫幫到有需要既人，唔知而家既教會究竟係點？

（今日無意間睇到Benson寫既說話，我先無意諗到係喎，點解我個時返咁耐教會，都無做過任何義工活動，又真係好似佢所講無對社會上既不公義事有任何幫助。）

2014年5月18日星期日

宜蘭台北遊記5.2 －Delay delay and delay

因為我們次次去機場都要趕Check In，都要跑到甩肺，今次就諗住早啲去機場啦，點知。。。

去到機場Check In時既然Delay...........OH....本來搭8:30pm，今次唔知要等幾耐呀！

今次收獲豐富，差唔多成20公斤。

因為Delay，航空公司每人比左$250台幣我地食晚餐。

我地叫左度小月既魯肉飯同春水堂珍珠奶茶

吾吾，度小月真係唔啱我胃口，一啲都唔好食。

食完飯都只係七點幾，但仲未有得上飛機，因為實在太無聊，於是check-in左先。

入到去有個郵筒，於是我地就買左明信片寄

跟住係間玩具店見到有個木製音樂盒，超靚，又平，終於左諗右諗之後，買左個返屋企，只係$570台幣，好抵。

(係香港誠品超貴，差不多一倍的價錢，下次去台灣我都想再買多一個！）

結果等了又等，好在係有位可以Charge電，等左5個鐘後，差唔多12點先上到機，第二日仲要返工，真係救命！

香港航空。。。。下次我都係要諗過先會再揀你！！！

終於寫完今次既台灣遊記喇！好鐘意台灣，如果下次再去一定要去漁巿場，同埋下次想去台中，聽人講話好靚架！

台北宜蘭之全紀錄

宜蘭台北遊記5.2 －Delay delay and delay

宜蘭台北遊記5.1 －戰利品,蜂大,書局街

宜蘭台北遊記4.3 －金峰魯肉飯，師大夜巿，寧廈夜巿

宜蘭台北遊記4.2－華山1914文化創意產業園區

宜蘭台北遊記4.1　胡同燒肉

宜蘭台北遊記3.2 紅樓 + 24小時誠品

宜蘭台北遊記3.1 橫風橫雨走佬去台北－Hotel Via丰居酒店

2013台北宜蘭自由行 2.4 晚飯時間

2013台北宜蘭自甲行 2.3 羅東林業文化園區

2013台灣宜蘭遊記 2.2 國立傳藝藝術中心

2013台北宜蘭之旅 2.1 早餐

宜蘭台北遊記1.2

宜蘭台北遊記1.1--到埗喇！

2013台北．宜蘭玩完雜感

在台灣也要上網

2014年5月17日星期六

宜蘭台北遊記5.1 －戰利品,蜂大,書局街

首先講下今次戰利品

Neutrogena在屈臣巿買的，買一送一，400台幣，即係約港紙$50一支眼霜，超抵！

Sofina防曬Lotion－$680台幣

Sofina爽膚水--$383台幣

好平呀，最後走之前再走左去屈臣巿買，今次係咁啱撞正減價，所以好平。

另外友人買左Dr. Wu，做緊買一送一，都好平過香港好多。

今天主要行程是台北車站及西門町

雖然今日十點半先起身，但都好眼訓，執埋行李都已經是十一點幾喇！

係酒店check out 後，再做埋暫存行李手續就出發。

點知落到樓下，好多舖頭都仲未開，結果我們走到蜂大Cafe吃早餐，可惜既係我地黎得太遲喇！早餐只去到十一點半呀！

我點的Earl Grey Tea同吐司

（因本人唔鐘意飲咖啡，無緣扮陳豪）

另外仲在問口買左個合桃酥，呢個超推介，好好味。

食完就走到台北車站買定今晚車飛去機場

今日超級天晴，台灣見到我地走，就天晴喇，真係岩有此理。。。

台灣原來會在餅舖賣點心，好搞笑。

台北車站超大，我們搵左好耐先知，要走到K12出口先可以買到機場巴士飛，票價$125台幣，國光巴士，每十分鐘一班，約一小時車程。

買完車飛，又去醫一醫肚，食左郭蒸餃，上次來台北覺得這裡不錯，所以今次來Encore。

入店後，發覺這裡面積少了一半，不知是否生意不好，所以縮減了舖面面積。

原來過了早餐時間是沒有蛋餅的，所以我們只叫了蒸餃同小籠包，蒸餃還保持水準，但小籠包就很麻麻了。

之後就到書局街，去左墊腳石書局(台北市重慶南路1段3號)，這裡的售價很便宜，面積又大，藏書量豐富，又有文具，係一個書蟲的好去處。如果大家沒太多時間格價，就來這間好了。

我自己買左幾本書，仲買左幾本簿，實在太平，忍唔住手大出血。

行完書局後，既然已經四點喇！就返去西門町，準備返歸，返歸前走左去食台灣傳統食品－楊桃冰。

這間好像是好多好多年歷史，裝修好像香港舊時的涼茶舖，這裡不是太多人，很容易找到位置。