Playground of Alika: 2015

2015年10月11日星期日

終於都要換喇+搶到HK EXPRESS機票

好耐無寫BLOG, 唔可以比自己咁懶, UPDATE下我近況先。

先講最近大出血, 係勁出血個隻。

首先有日陪朋友傾電話計劃時, 我無端端出左Iphone 6s plus......真係真係好似撞邪咁....

咁就無左八千幾蚊喇!

話說我上一部係Iphone 5, 用左大約3年, 舊電就已經壞壞地, 打機既話, 用一個鐘就會無電, 仲要成日30%熄機, 可能因為咁, 我就神推鬼X底下, 出左部新電話。

咁新電話真係好用好多既, 起碼舊電可以比我用一日, 仲有佢係128G, 我之前部32G, 我都用到唔夠位, 而家好好多。

不過再話時話, 我個時去賣左部舊機時, 唔知係咪比人壓價, 900蚊就賣出喇 ><

--------------------------------------------------------------------------------

講完電話, 就講旅行, 話說我咁耐以黎都訂唔到特價機票, 次次都LOAD唔到入去。

點知原來, 如果間航空公司多機票, 只要遲幾個鐘入去就買到喇。

不過我今次張東京機票, 因為要就埋個朋友, 跟住加加減減後, 張機票係平左少少渣。

但係去大阪張機票就好抵喇, 因為我一個人去(我第一次一個人去旅行), 時間自己就, 比我買到8XX機票, 超開心!!

滿心期待ING!!

(話說我上次去東京時無寫BLOG, 而家諗返起真係乜都唔記得, 所以今次我一定要寫返BLOG呀!!!)

仲有就係, 我離開左我工作左7年既公司, 前途茫茫中, 不過我又好享受而家既FREE, 希望下次搵到份好工!

順帶一提, 我個FB PAGE係https://www.facebook.com/alikaplayground

2015年9月7日星期一

新遊戲LINE PLAY + FACEBOOK 開PAGE喇

最近又玩新遊戲喇，就係呢Line Play, 其實出左好耐架喇，不過我後知後覺，而家先開始玩啦！

我一直都好鬼鐘意Q版公仔，所以一見到就好鐘意喇！

呢隻GAME完全唔洗用腦，都係去下朋友屋企儲錢，有錢就去買傢俬同衣服啦！

同以前FB既pet society 係差不多玩法啦！

佢仲同好多好多公仔cross over 架，好似杯緣子、鬆馳熊同小丸子啦！

抽左好多錢先有小丸子面具呀！

講左更多，梗係想多啲人同我一齊玩啦，如果你都想玩，不如打我既邀請碼啦！

LINE PLAY邀請碼：ST－6350-2006

講完隻GAME，仲想同大家講我開左Facebook Page呀！

因為我成日都有好多無聊野想SHARE下，所以就整個PAGE啦，同埋可以當係個BLOG既簡約版，有興趣既朋友，黎LIKE下啦！

https://www.facebook.com/alikaplayground

2015年9月4日星期五

澳門HEA到盡遊記

今年生日慶祝活動－－過大海。

因為金光飛航生日月份可以以優惠價（230左右來回）買船飛，所以就過澳門玩下啦！

不過唔知係咪優惠，啲時間勁衰，下午一點去，下午七點返。而且個售票員態度又勁衰!

落船乙水仔，可惜我地住既十六浦係無車係呢邊架。。。。我地又唔識搭車，結果係個度左搞右搞，差不多成個鐘先上左去葡京既車。

酒店相後補。。

去到酒店，搞埋CHECKIN都成四點半，我地就立即換衫去游水，我呢個大鄉里，第一次係酒店游水，完全唔知有會有LOCKER同大毛巾提供！！

好趕急咁游完水，就到左我地今晚既重點節目，就係去MGM既夜晚BUFFET，由六點至十點！！正！

每枱都有既麵包，好脆身，都幾好味，不過梗係唔食咁多啦，要食啲貴價野架嘛！

長腳蟹係我至愛，呢度啲蟹都好好味，超正！

啲三文魚魚生好好味！正！

熱盤真係遜色左少少，而家做緊東南亞風味。。。我地真係黎得唔及時。

甜品有雪糕，仲好好味，我好快食哂，無影相呢！

但其他蛋糕甜品就麻麻，係得個葡撻好味！

其實仲有生蠔（好味）同埋龍蝦，龍蝦勁搶手，但我完全唔覺得好味，都係芝士焗龍蝦最好蝦。

食完我地又走左去行八百伴，跟住就返酒店喇！

第二朝，我地JOIN左十六浦早餐BUFFET，呢個真係高水準，好多野揀，勁力推介，個牛角包好好味！！仲有蘋果批、粥、生果、魚蛋粉、粟米片等等

我地呢個勁HEA之旅，食完早餐，又去賭場行個圈（行一個圈就無左二百幾蚊喇！）

跟住我地盲無目的咁行，又見有啲肚餓，竟然揀左鼎泰豐食飯。。

不過又真係幾好味，又唔洗等位！

呢個冷盤海哲好好味！

每次黎都必食炒飯

要補充下纖維

呢個就麻麻地！

最後，我地去左舊葡京買澳門手信，超好味既曲奇！

呢隻曲奇真係好好味，又唔洗排隊，超正！後悔淨係買左盒細返屋企，下次要黎掃多幾盒先得！(最近好鐘意相入面個隻公仔)

今次旅程，由於我地係廢青，又無乜特別地方想睇，結果差不多無離開過冷氣地方就返香港喇！

2015年7月22日星期三

姣婆守唔到寡...2015書展又買過喇

今次好似係咁多次中洗得最多錢><, 啲書唔睇就哂我啲錢!

鑑於我上年既往績,

今年終於一本英文書都唔買喇!!

其實今次大部份都係繪本,

應該睇到8成架!

第1本-- N-Girl養成術

由於覺得啲公仔太得意, 忍唔住手買。

本書雖然字多圖少, 不過啲文章都係幾好睇。

N-Girl就係一個勇於打破慣例, 心口有個勇字既Girl啦!

本書好鼓勵大家出去交遊廣闊, 對於我呢個孤獨精真係有啲困難。

第二本當然係支持左咁多年既馬仔啦!

仲係好好笑, 一啲都無跌WATT

謝曬皮--我真係好鐘意睇佢啲書, 頹得黎好啱我。

今次睇過新書覺得麻麻, 買返佢兩本舊作!

日本雜誌, 中文版

呢本好吸引, 仲有好多唔同既題材, 好似雜貨, 漫畫等等,

好想本本都買黎睇!

其實呢買左好多本畫公仔既書(不過多數睇幾頁)

但見到呢兩本咁靚又好衝動咁買左!

最後呢本, 等左成個鐘,

個書商話賣哂, 要等一個鐘先有,

問佢幾錢, 佢話80元,

點知一個鐘返轉頭之後,

佢想坐地起價, 收我地90元

好彩佢個職員幫我地口,

結果80元買到喇!

呢本成人填色書, 啲人話可以舒緩壓力,

而家我呢中童當然唔執輸, 買黎玩下。

今次書展, 無想像中咁多人。簡體字書係內地出版社反而唔係好平, 去田園/愉林買仲平。今次書展仲買左2副puzzle 同1 個Tote Bag, 真係超大洗呀!

2015年4月30日星期四

套戲都應該落畫了。。。不過我拖到今時今日先寫出觀後感。

其實最初睇張海報, 都無諗住去睇, 好似好老土既溫情劇。。。不過後來知道係真人真事改篇, 又好多人好評就買飛入場。

---------------------------------------------------------
在香港的畸形教學制度下, 要堅持理想真係唔容易, 明明做教書, 但就要做好多好多行政工作, 仲要應付咁多怪獸家長。

呂校長本離開名校打算退休, 意想不到殺出一間村校以4500元請校長, 呂校長不忍五位小孩無書讀, 毅然接受這個職位。雖然錢賺少了, 但呂校長卻開心了, 命運實在令人難以估計。

我自己幾鐘意前半段戲, 講下校長背景, 講下五個小孩既苦況, 都拍得好細膩下。但去到後半段, 我就略嫌煽情。當小朋友們在台上唱歌的時候, 全部大人就係咁喊, 我覺得誇張左少少。

片中我亦覺有些犯駁之處, 森美個PART, 我覺諗得比較粗操, 森美一句記得將啲相放上facebook , 就過份刻意之餘又同時代背景不夾, 那個時代根本未有facebook。而森美遊說呂校長做補習天后既時候, 同場卻會有其他投資者在場, 就有些抽離現實, 試問你未同人傾惦數, 又點會敢約老闆出來呢!?

另外, Jennie與Kitty的父親, 由重男輕女, 瞬間變到支持女兒讀, 這過程亦都太過奇妙。這段戲對電影中心思想並沒有什麼關連, 倒不如刪掉仲好。

此片票房報捷, 全賴一班小小演員, 她們的演出簡直無得頂。有人話唔信小朋友能夠講出這麼有智慧的說話, 但事實上小朋友人仔細細已經好識諗野, 還要加上她們當中幾個經歷過不同慘痛經歷, 自然加快了她們的成長。令我最深刻既就係雨中的一幕, 拍得很感人。

在這個人人都話要嬴在起跑線的社會上, 家長們看完此片又會唔會諗下比番個快樂童年比啲小朋友?

2015年4月28日星期二

韋家輝

最近有點兒懶, 少寫BLOG.......

最近重播大時代, 暫時我都無乜點追, 我想等劉青雲出現先開始睇。

大時代套片簡直令我又愛又恨, 套片係好好睇, 但係睇到丁蟹咁癲.........劉松仁明明咁好人, 但最後被丁蟹害到破產, 仲最後被佢打死埋! 跟住丁蟹一家好似仲未夠喉, 仲要害死埋玲姐同佢埋展博啲細妹。

你諗下係一套戲入面要睇住咁多人死, 仲要死親都係好人, 心理真係好難平衡!! 仲要聽埋丁蟹啲歪理, 真係好難忍受! 為左報仇要死咁多人, 咁係咪唔應該報仇會更好?

由於我覺得個編劇一定有理由先咁寫既, 所以我就不斷search編劇韋家輝的資料。

好多人話韋家輝電影成日講宿命, 但究竟乜野係宿命呢??

我而家好想睇返哂韋家輝既電影, 而家我仲煲緊大隻佬既影評, 睇黎有排睇!