誰調換了我的父親+芝士火鍋

又又又一個星期喇~~

真係要快馬加鞭寫返啲Blog 先得!

上星期六一早起身睇左福山雅治套"誰調換了我的父親"，最初諗住睇呢套戲會喊死，點知都OK喎，導演唔係用啲好煸情既方法去拍呢個題材，而係一種淡淡然慢慢敍述件事比觀眾知，觀眾可以係中間有時間諗下野，好似比著你揀，你究竟會揀返自己個親生仔定係揀對左六年既養子？如果比著我，我就一定揀養子，話哂對左六年，六年既感情真係唔少野，同埋我覺得咁樣無端端叫個六歲既小朋友改變哂生活習慣同埋適應過個新家庭都好困難，都係維持現狀好。

套戲最搞笑係開場小朋友去入學試，細細個就講大話，咁樣唔係幾好喎，不過而家社會既父母，係咪為求達到目的會咁樣不顧道德架！？　仲有福山雅治留係屋企露營，呢幕真係好kai，唔知真實裡有冇人真係咁做。

睇完戲，走左去好耐都冇去既大角咀海傍影日落，不過由於我搵出街衫既關係，結果遲左去，去到個太陽都落得七七八八喇。。。今次我有係天文台個網睇下日落時間，天文台又真係幾準喎！

星期日夜晚就去左食意粉屋既芝士火鍋，套餐價$388+10%，不過個套餐無野飲都算幾貴啦！食過今次之後，都係覺得芝士火鍋配麵包同薯條係最襯，其他就只屬一般，特別係我地個餐有牛肉，一放入去就有啲血水滲出去啲芝士到，好鬼核突，下次都係唔叫肉類。同埋芝士火鍋個火好細，太多配料真係會打得好耐好耐，都係食少少就夠喇！

星期一晚唔知乜事喉嚨痛到醒左，又係咁流鼻水，結果星期二請左日病假，今次唔想再睇郭醫生，咁就走左去睇關醫師，呢個醫生我都係第一次睇，佢應該係好大年紀架喇，佢就比較求其，但啲藥好似同我夾過郭醫生。