2013。音樂

又到每年頭回顧下上年既聽歌走勢

越近年尾就越記憶猶新，又好似係越鐘意。

1. 美麗到不能－藍奕邦
這首簡直是正面到不能既歌，而又唔似好說教，似藍奕邦同你傾緊計，講緊故仔你聽。
呢幾年都冇聽藍奕邦，因為佢之前啲歌實在太過懷舊喇，一聽就覺得我聽緊20年前既歌，我唔係好接受到啲歌玩懷舊。
好彩佢終於玩夠，返番黎喇！今次成隻碟我都好鐘意，期待藍奕邦下一張既大碟！


2. 音樂殖民地－CAll Star
一來好鐘意電子風格既曲風、二來首詞好得。首詞講音樂媒體發展經過，除左我冇經歷過黑膠碟，我都差唔多經歷哂音樂媒體既變化。



3. 我就是主角－ J.Aire

很愛王迪詩填的這份詞，很有意思！

『恐怕不再心跳　快樂記憶忘掉　高處去找奧妙
　小單位買到了　但夢已經生疏了　消散飄渺
　拋開一切需要　放任放聲撒嬌　再遇上生命浪潮
　來抱著這刻為盡情歡笑　明日呼吸可會繼續誰知曉』


4. 牆外之音－黃浩琳
作曲：黃浩琳　填詞：黃浩琳、游思行

係好後期先識得呢首歌，第一次聽已經好鐘意。同J.Aire一樣都是今年新人同埋都係唱作人。今次填詞仲搵左好耐冇見既游思行合寫，歌詞好有意思，係叫人唔好淨係追逐名利，好應該跟住自己感覺走，同J.Aire既《第一志願》、《我就是主角》既題材一樣，而我自己亦都超鐘意呢個題材。

5. Shine

愛迪生－Shine
作曲：James Ting 填詞：黃偉文

好想有機會去睇Shine演唱會。佢地既歌永遠都係咁正面！


6. 青春頌－許鋌鏗
呢首唔洗多介紹，我成日諗青春係咪已經遠離左我，定係老土啲講心境青春就得？


7. 任我行－陳奕迅
都係講成長既歌，究竟係隨波逐流定任我行開心？


8. 講多變真－沈震軒
十分期待的男歌手，有樣貎又有歌藝。


9. 世界劇團－馮允謙
呢首歌聽得好舒服，正！



10. My Little Airport
本來諗住搵十首2013既歌，但真係搵唔到，呢排最鐘意聽既係My Little Airport，佢地出道左好耐架喇，佢地既歌好有玩味，歌詞抵死，有時又會有啲黑暗，好特別的一隊組合！



往年的：
2012．音樂 

2011．音樂 
2010．音樂
2009．音樂
2008．音樂

恭喜發財

最近好懶寫blog, 今日年三十晚無論如何都要出篇Blog同大家拜個年!!

話說上星期四終於完成左個course， 呢個course真係好多功課，好似返左去以前讀書時代咁，不過咁都好既， 佢唔迫我，我都做唔到咁多野，遲啲放上黎比大家欣賞下。

完成左個課程之後，就開始準備新年喇，主要都係執屋同買新衫

星期日好誇張，個日瞓得超多，本來諗住去銅鑼灣，結果因為瞓過龍，去左尖沙咀。

行左美麗華同加連威老道，呢度都算好喇，唔係好多自由行，不過IT衫減左價都覺得佢好貴，買唔到衫，反而買左個大背包，買既時候，不斷諗買黑色定杏色好，雖然我鐘意黑色多啲，不過我太多黑色既東西喇，所以買左個杏色（謎之聲：有人話越老越鐘意色彩鮮艷），下次去旅行有新袋用喇

跟住去食韓國菜，叫家家戶戶，環境唔錯，不過就貴左少少，同埋我自己叫炒年糕，食左之後先發現原來自己唔鐘意食　囧，辛苦友人食哂去喇！

星期一放工繼續行街，今次轉戰旺角，食左間好辣但唔錯既中菜，最緊要係唔洗等位！

琴晚去左銅鑼灣，嘩，今次放工搭地鐵過海，真係一種煎熬。司長話叫我地等多班車，我想話我等多左3,4班車，同埋係月台度我唔洗郁架，係啲人不斷迫過黎迫你向前，又熱又辛苦，係個刻我真係覺得自己係蟻民。

去到銅鑼灣站都係好恐怖，我見到咁擠迫，今年真係冇勇氣去行維園花巿。

今次好多收鑊呀，買左對鞋同一件衫。行過誠品仲見到而家有糖村買，仲有我係台灣見到好靚既音樂盒，不過誠品賣貴得好多，好彩我係台灣買左個返來。

友人睇中左對鞋，但無碼，我地仲特登去埋波鞋街，好彩皇天不負有心人，友人都買到對靚鞋，仲要平左百幾元。

今日差不多收爐喇，可以放四日假喇！

係度祝大家

身體健康！
財源廣進！
馬到功成！
心想事成！

除夕澳門2013-14 Part II

第二天，今日係2014年喇，我地今次竟然食到早餐，奇跡。酒店自助早餐，一般水準啦，如果啲野食再熱啲會開心啲！跟住上返房磨到要交房個刻先走。

第一站去左碼頭放低啲行李先，咁樣可以行得自助啲嘛，跟住係落左去銀河睇下有乜好野食，結果竟然係去左食間日本野，普普通通啦，無乜特別！

跟住就搭車去官也街，今次我地盲無目的咁亂咁行，經過左幾間小店，又經過左間澳門歷史博物館，見唔洗比錢入左去。

入面有個遺址，你可以係上面行，但係地下係玻璃，行既時候又真係幾驚架喎，驚啲玻璃爛，好似玩緊機動遊戲咁。仲睇左少少澳門既歷史，原來澳門以前係做炮竹／煙花，不過後來就比大陸平價同業打冧左啦！


我地路經一間珍珠奶茶舖，個店員係咁同我講國語．．．我聽唔明，好辛苦先叫左杯珍珠奶茶，又幾好飲喎！

跟住五點幾搭車過去八佰伴，剛剛好落日，個天好靚，我見個天咁靚，就係新葡京落左車，行左去河邊個邊，咁跟住奇事又再黎。

有個操普通話既男人，

陌生男:你地邊度黎?

我地:下(心諗關你乜事,冇答佢)

陌生男:你地可唔可以幫幫我呀?

我(見佢好似好可憐):幫什麼?

陌生男:你地可唔可以借錢比我?

嘩，三九唔識七問我地借錢，我地又唔係好有錢，結果就走為上著，諗返轉頭都幾驚，個時得我地三個，佢如果用暴力，我地都唔知夠唔夠佢打架嘛，好恐怖呀！

又再去八百伴既安琪兒，諗住啲咁騎呢時間唔會好多人啦，點知都係排長龍，好彩前面全部係大枱，好快就有細枱比我地，呢度個三文治真係好味道，值得再來。

今次又發生左個奇事，話說我打住機等食物黎，最初有個意大利廚師（其實我唔知佢係乜國藉）拎住碟三文治經過，口邊話"Busy Busy, telephone”，咁我以為佢同緊佢既同事講緊就無理到，之後佢又經過喎，佢就話"still busy”，原來佢係同緊我地講，佢見我係到玩電話，就唔上菜比我呀！結果我咪話"No, no finish"，佢先肯上菜！個廚師好搞鬼！

食完又行左陣八佰伴，行過porter tokyo，好似有啲款香港冇，我睇中左個背包，不過呢好貴呀，暫時未捨得買住！

行多陣就走人喇，今次冇去郊遊，好似差咁啲，下次再黎澳門的話就去返啲遠啲地方啦。 

除夕澳門 2013-2014

好鐘意過澳門，因為可以離開香港，好似去左個小小旅行咁，同埋好多好平既自助餐。今次又黎澳門過除夕喇，不過我太渣喇，冇出到去倒數。

朝早搭11點船，但前一晚仲趕緊夜車做功課，超唔夠瞓。我地係九龍上船，KEKKE所以我地係搭的士去碼頭，可以瞓耐多少少:)。

係大家樂買既早餐，個蛋真係好唔好食，呢個咁既早餐要成30喇，如果唔係趕時間，唔會買大家樂！

一落船有個澳門購物節抽獎，kekek我抽到$100購物卷，買滿$200就可以用喇，個職員話我地可以去鉅記用，真係好Lucky。

跟住我地就搭車去左大三巴。有好多聖誕裝飾，好得意。

這個公仔好cutie呀！！

亂咁行左陣，去埋盧家大宅。

仲去左呢個唔知乜乜教堂

 

今日天氣好好，諗住拎部相機出黎影多啲相啦，點知部相機既然係呢個時候走焦．．．最初諗住係咪我地自己手震，但係後來發現無論點影都走焦，即係要拎去整啦！激死人啦，Sony 係咪玩野呀（事後証實支鏡壞左，個維修員最初仲同我講話冇壞喎，最後去拎支鏡又話啲零件壞左，而家對Sony無乜信心！)

玩完之後去左八佰伴，諗住去食安琪兒啦，點知排長龍，咁諗住周圍行下睇下食乜野好啦，結果行下行下去左新葡京食粥粉麵，友人話佢碗刀削麵幾好食，而我由於夜晚食自助餐，就叫左個撈麵（其實我好少食撈麵，所以唔識評論好冇食）。

呢度十分之好坐，但係就要留意你隔離枱坐個乜人啦，我隔離枱坐住左個大叔，佢食完野，係度用茶“朗”口，超核突！大叔你就食完飯啫，你可唔可以諗下你隔離枱啲人係未食飯架，見到你咁，我仲邊有胃口呀！頂你個肺！

跟住我地就去酒店，今次book左利澳酒店，主要係貪平，同埋有浴缸。去到佢仲同我地upgrade左間房，超大間，真係屈蛇都得！係酒店到抖左陣就去MGM喇!!

呢個係我地走既時候先記得影相，所以成間房超亂

由於除夕關係，今晚Buffet分兩個時段:5:30-8:00; 8:30-倒數，倒數個個成千幾蚊位，但係都full，啲人真係好豪，我呢啲星斗巿民，就只好去早段啦。去到仲有少少時間，又入左去玩左陣老虎機．．．結果就係輸左幾十蚊。

以我地唔執輸既性格，所以5:30好準時入到去，真係好多野食。MGM仲預備左好多玩具放係枱面比我地玩，好細心。今次MGM Buffet係超級滿意，佢枱同枱之間唔迫，拎食物又唔洗排隊，食物質素好好，仲有唔知係咪因為除夕，佢安排左即影即有、魔術表演、扭波同紋身比我們玩，安排得好周到。同埋侍應真係好好招呼，仲要你每次離開位都幫你摺返條餐巾，執野又快，真係抵佢咁貴！

呢隻醬好好味呀！

佢既乳豬同平時食開個啲好大分別，下面個層唔知係乜呢？

係我地食野時候都有小插曲，話說隔離枱個細路唔識開蟹拑，佢係咁用隻蟹拑敲枱敲碟，佢老豆一啲都冇阻止佢，跟住敲敲下佢連碟都敲爛埋，個細路仲係度好得戚咁笑，佢老豆仲笑埋一份．．．真係呢點教細路架，敲爛人地隻碟已經唔啱架啦，仲要係咁笑，真係過份。

今次大部份食物都好滿意，係個鵝肝（定鴨肝）煎得唔夠香口同甜品區啲蛋糕麻麻地外，其他都好滿意，寫到呢度我都好想再去食。

食飽飽就行左去鉅記買野啦，去到見到一堆自由行（我估），買左勁多野，個sales見我地買咁少野一啲都唔想睬我地。

買完野就行返酒店啦，行到新葡京入左去又玩左幾舖老虎機，但呢度一啲都唔好玩，又多煙味，啲機又舊，啲服務員態度又差，唔會再去個度玩！！

之後返酒店睇倒數，估唔到有阿GEM睇，阿GEM都黎左漁人碼頭，yeah~~可惜我太累，去唔到現場倒數啦～

呃文篇: youtube分享

好懶好耐冇寫BLOG, 今日都好懶都係貼下最近我覺得好好笑既youtube片段。

呢個叫鬆馳熊既video 頻道，係有個甩住鬆馳熊頭公仔既男仔，講啲好搞笑既野，真係好好笑架，有時間大家一定要睇








仲有就係我之前定個目標話要做運動，咁我就真係多左行路既，同埋跳左一次咁多既萬寧Ｘ鄭多燕。。。。。。。。。要努力啲先得喇！！




－－－－－－－－－－－－－－－－－－－－－－－－
今日記趣：
就黎上完堂喇，今日個hea Sir直頭係8:00就叫我地自己做野，真係Hea，咁與其係個度做功課，咁不如返屋企自在好多啦！結果就9:00前就返到屋企喇！

2013 Christmas

平安夜返工，好surprise收到兩盒朱古力，多謝哂！！

夜晚就去左九華徑吉吉燒BBQ，＄200任食，都算幾多野食，呢度自己出去食物區夾食物，鐘意食幾多就拎幾多，我覺得好過小欖個BBQ場，小欖BBQ場係職員夾比你，有時想食少少就夾好多比你，浪費左啲食物。個日仲係朋友s既生日，不過我唱完生日歌就好快走左喇，因為燒到一半，有朋友唔舒服，所以早走返屋企先。

廿五日收到份好得意既聖誕禮物，好鐘意。下午去左睇『掃毒』，套戲有劉青雲、張嘉輝同古天樂，好難唔好睇，條橋唔錯，劉青雲要兩個揀一個，呢樣真係好慘，佢點做決定都會後悔，不過我覺得個ending就有唔合理，張嘉輝跌落鱷魚堆入面都冇死，仲要最後係間Bar入面，三個人打成隊軍隊，都可以打嬴，呢個結局我唔係好接受到。

Boxing Day同mark 6去左圓方MangoTree食high tea，食物係唔錯，不過下次我想食西式Tea，泰式感覺好似怪怪地。呢度坐得好舒服，最意想唔到係可以睇到日落。Juju越來越搞笑喇，小朋友無憂無慮成日傻笑，好得意。食完無隔兩個鐘就又去左食元氣喇，第一次以咁既組合去食壽司，今日發生左件搞笑事，就係無端端我地張枱黎左玉米壽司，呢類唔扺食既壽司平時我地係唔會叫架嘛，大家係度O哂咀既時候，我發現應該係我本來諗住叫玉子壽司，但剔既時候剔左玉米．．．

Bye 2013 and Look forward 2014

首先回一回帶看看2013目標，結果真係強差人意，睇完個心都灰灰地。

工作
上年諗住一定會轉到工，事實上我亦都係年頭有搵過下工，結果就係乜都冇變，依舊原地踏步。無論如何，2014年，我要轉工，Delay no more!

不過今年都好，起碼我係前途上搵到個新方向，雖則唔知得唔得，但唔試過又唔知得唔得既。

運動
上年定左個好低既目標，不過都係做唔到，今年希望每星期都做一次運動（起碼30分鐘），呢個比上年個個定得更高，不過仲唔迫下自己真係唔得喇！

話說其實我有舖睇跑鞋癮，仲成日都好想買對返屋企，不過我睇中既都要成千蚊先有一對，所以我就好希望今年我會去跑步，如果我真係成日跑，買對咁貴既都值得吖！

我另一大目標係減肥，咁如果我keep到做運動，就一箭雙鵰，完成到兩個目標，今年加油。

書
上年睇書真係少，我估大約睇左五本，不過我諗今年都可能差唔多，所以都係維持上年既目標，上年目標係可以睇到十二本，即係今年睇既double。

相片
上年希望自己會執下電腦入面既相，不過我好快忘記左我呢個目標，所以又係今年再繼續。今年學左個新方法放相，個新方法係用類別黎分相，而唔係用日期，咁我而家就分左旅行、朋友、遠足等，暫時用落又好似真係易搵相啲，等我再用多陣，睇下成效如何。

寫Blog
上年實在大躍進，既然寫左百幾篇Blog，咁今年希望可以齊頭寫到150篇blog啦，之前試過一日一篇，不過成日都覺得冇乜野寫，但諗落其實我又好多野未寫，所以呢，今年繼續努力！

打機
今年連續被兩隻Games吸引，第一隻就係Candy Crash，第二隻就係神魔之塔，我到而家都仲玩緊神魔之塔，如果神魔之塔係原創的話，可能我都會比錢落去玩，但係明知佢係抄人既，我堅持唔會比錢落去！

不過呢，我都覺得我打機時間實在太多，我要諗下辦法縮短啲時間，拎返啲時間做正經野先得！

畫畫
上年先發覺原來我都係可以畫到幅畫出黎，而唔係四不像，雖然我只係係小學程度，不過我都好開心喇！我希望今年可以再畫多啲！

電腦
上年自學After Effect，今年繼續，要快啲精通After Effect，睇電視話你每樣東西放一萬小時落去就會有機會成功，咁我都想今年可以放到更多時間落After Effect上。

心態
今年我希望保持樂觀，因為聽人講你越樂觀就會越好運，我希
望我可以吸引多啲好事黎我身邊。

既然年齡上我都唔再青春，咁我惟有保持青春心境啦！

懶／瞓覺
瞓覺簡直係我天敵，正常瞓8小時就夠，不過我成日都瞓多過呢個鐘數，今年我希望瞓少啲，多啲時間做野。

宅
人越大就越來越宅，好鐘意自己一個係屋企hea，好懶落街。明明記得小時候成日通街走，唔知點解大個左會咁，可能第時老左會越黎越孤僻．．．

寫住咁多先，希望每個月既一號再來 review多次！