Playground of Alika: 過年雜記、賭城風雲

年三十晚屋企食盤菜, 食飽就想訓 , 結果訓左冇去行花巿年初一拜年，又係食盤菜，又係食到好飽，夜晚去左睇《賭城風雲》。

小時候，好鐘意睇《賭神》，個時發哥真係好型。不過過左咁多年，套《賭城風雲》同《賭神》啲橋差不多一模一樣，可能因為我已經唔係細路，感覺悶到癲。今次啲劇情幼稚，套劇其實有好多無厘頭位，好似無啦啦殺出細細粒個男友同賭神鬥地主，跟住中段有幕賭神洗啤牌，又穿哂崩，一睇就睇得出副牌係假，個道具同20年前一樣，我真係接受唔到。

（以下有劇透）故仔講發哥同洗黑錢頭目鬥，話到個頭目好聰明，但係係套戲入面完全睇唔出。跟住用埋啲迫攻水即係以前既誠實豆沙包，劇尾又玩變臉又係揸船出公海同用超高科技睇穿牌。而點題既賭博片段就只係得一、兩場，仲要超求其，成套戲都只係翻炒舊橋，咁我不如睇韓版家有喜事好過。

雖然有話新年都係搵套戲笑下，唔洗咁認真，不過見到啲咁唔認真製作，又老土既笑位，真係點都笑唔出。

睇完戲都好夜，但係西洋菜街都仲有好多小販，呢個情景係年初一、二、三先有，好熱鬧。

年初二，留左係屋企hea，係屋企食左蘿蔔糕同奶皇年糕，個奶皇年糕好似係新產品，我都係第一次試，我覺得都有啲啲奶皇味，不過其實同普通年糕差唔多，我都係鐘意食奶皇包多啲，呢隻試過一次就夠喇。

年糕仲食到個人好滯，不宜多吃。夜晚有放煙花，又係冇出街睇，我係屋企都睇到少少。睇無線直播，唔知今年無線個攝影師搞乜鬼，鬆郁濛，而亞視更加搞笑，拎返1990年既煙花片段出黎播，亞視真係出其不意。

年初三，晏畫去左尖沙咀八月居同大佬們飲茶，仲有無見左六年既歌莉雅，勁多笑話，又梯又森林，真係好好笑。不過間酒樓食物就差左啲喇，最後我地係個度切蛋糕，因為今次係雪糕蛋糕，我地點切都切唔開，好彩有個好好心地侍應，幫我地好努力切開去。

我見到fb有人post 話深水埗有好多熟食小販攤檔，所以落左去睇下。嘩，我估唔到有好多菲律賓人係度攞賣，佢地真係識搵地方，跟住周圍行左陣，本來諗住睇下ipad套同筆啦，點知都好貴，都係淘寶算喇，又搵唔到熟食，就打道回府。夜晚去好彩酒家食飯，菜單同去結婚飲宴差唔多，又食到好飽好飽好飽。

之後又走左去行西洋菜街，見到好多小販，陪人地買左幾串小食，就走鬼喇！咁我們惟有行陣乾貨先，買了不少東西，分別是掛牆鐘（$99），法國版既Scrabble（$50），仲有陳奕迅演唱會DVD。跟住又行返去朗豪坊個邊，睇下走完鬼未，可惜仲有好多亞Sirs係度，咁我地就走啦！點知行多幾個街口，就見到啲小販係個度開緊檔，咁地就去望下有乜食啦，不過食物方便呢有少少強差人意，同埋係個垃圾站隔離，有啲臭，我地乜都冇買就走左喇！

放哂係地下的翻版公仔，我覺得都幾污糟，你又唔會知公仔入面啲綿花係乜，可能係啲受污染既綿花，你晚晚攬住啲不知來歷既公仔都想嘔啦！

最初我估好少人買，點知我估錯喇，勁多人買隻返屋企。