偷懶，呢排冇乜寫blog，因為好似冇乜好寫咁，日日如是，返工放工訓覺。
琴日晏晝收到個大陸電話同我講煲冬瓜，我實在唔係好識聽，好彩講講下佢講到580，原來佢係上網話買我支燈個個人，我聽到佢話佢出黎旺角同我交收，咁梗係好啦，佢連價都冇講就同我交收喎。
咁我返屋企立即搵返哂個盒呀，保證書同單出黎，仲整走埋啲魔術貼。
跟住我地左約右約就約左係星際到交收，最搞笑係入左間二手店到交收，佢係個度買緊部6D，我問佢洗唔洗等佢買完部機先交收我支燈，佢話唔洗，仲係人地間舖頭度試我支燈，同比埋錢我！
原來個間舖頭賣我個支燈，二手價成2580，我賣比佢2000，所以佢就幫我買枝燈，而陪我去交收既小宅，仲話佢見到人地個銀包到有一大疊一千蚊紙．．．．嘩嘩，而家國內啲人真係勁有錢，唔怪得香港金舖、錶舖、名牌店開得咁多啦！
我同小宅仲係度話不如整樣生意係賺自由行，佢地咁豪爽，一定好好賺．．．不過呢到而家都未諗到做乜LOR．．．
最後，因為元氣長期排長龍，就去左笑笑食晚飯，其實味道唔差架，係賣相差左啲，最好笑係我地係食第一啖話麻麻，但越食就覺得都OK吖～～
生菜蟹肉沙律，啲蟹肉係幾好味既！
泡菜豬肉火鍋＋烏冬＋蛋，成一百蚊呀，好貴呀！味道就一般啦，我鐘意吉野家多啲！
Pizza啲dressing好味囉，咁都幾薄幾脆既！
不過諗落二百五都幾貴喎，都係多啲人黎食先抵啲！
我部電話update 左去ios 7......我覺得好唔順眼，我鐘意以前黑漆漆既bg多過而家咁白LOR!
個PIZZA真係越食越惹味呀~~
回覆刪除