點解陳皮梅係香港手信？

之前去台灣旅行，打算買手信（伴手禮）比台灣既朋友，但我自己諗極都諗唔到香港究竟有乜手信呢？

咁我就上網搵啦，點知比我搵到竟然係優之良品既陳皮梅！！？？ 乜台灣人好鐘意食陳皮梅既咩？我好似呢廿年都冇食過，另外，優之良品都冇香港人去架啦，同埋以我理解做得當地手信既，都應該係用當地盛產既東西黎做架，乜香港盛產陳皮／梅咩？我一啲都唔知！

不過我見既然搵到個咁既答案，就走去優之良品睇下啦！嘩！真係咪講笑，一包陳皮梅索價$150，真係嚇到我即刻走出門口！（咁我睇個包冇圖呢包咁細既，大約大一倍到啦！）

我都唔知原來陳皮梅身價係咁高既！？同埋優之良品既陳皮梅係咪真係咁好食呀？有冇人可以請我食粒呢！？

講完陳皮梅，就講埋台灣人來香港啦！最近我有個新嗜好，就係睇下台灣人到香港既遊記同埋旅遊書，咁綜合來睇，佢地鐘意香港飲茶、粥、煲仔飯、菠蘿油、奶茶同魚蛋啦！

我又留意到佢地飲茶淨係鐘意叫燒賣，好少叫蝦餃架喎，唔通台灣人唔鐘意食蝦？

咁菠蘿油我自己都好鐘意食，不過我多數都係去麵包店買，而遊客呢就會到茶餐廳食！好多都會話香港茶餐廳飲野好貴，咁梗係啦，因為香港人習慣叫套餐架嘛，我真係好耐冇試過入間茶餐廳淨係叫杯飲品喇！