中秋節Long Weekend

中秋節有個long weekend實在太好喇! 

不過我就仲係成日咳，咳足成個禮拜。仲要放假先發現，我將支咳藥水漏左係office，咁惟有去買過支新啦！

係萬寧見到呢支又係珮夫人既加強版，結果買左呢支返屋企。呢支咳藥水，都幾work呀，真係咳少左。

假期第一天

入左小欖BBQ，嘩，真係熱到飛起呀！熱到係唔想食野個隻，雖然咁熱，不過香港人仍然好鐘意BBQ追月，我地個個場全場full哂！

小欖燒烤場食物真係麻麻，啲腸仔好咸，比較好食係啲粟米、多春魚同雞翼。其實我地都好醒咁諗住自己帶啲蒜蓉入黎調味架，不過好搞笑地買錯左薑蓉，仲要燒完先知，超爆笑！

我地見到隔離枱買左海鮮、菜、金菇同錫紙入黎，下次睇黎我地都要自備多啲野食先得！

假期第二天

上左山頂，原本我地個plan仲話去蓮香樓飲茶．．．但我地太懶，唔願早起身，沒去到！

我地今次冇揀纜車，揀左平啲既巴士上去，不過平係有啲犧牲，就係巴士冇咁定，搭完有少少暈車浪！

上到去已經差不多日落喇，影左少少相同video。

今次第一次用Sony NEX 5R，但我仲未好熟個Setting，今次信左佢隔10s先影一張，結果影左成粒鐘先拍左5s，咁我嫌個video太短，所以今次較慢左一倍，變左11s

好似話因為颱風所以個天既顏色先咁靚

跟住仲行左陣山頂廣場，呢度多左好多shops，連coach都有，而家coach真係無處不在，真係有咁多有錢既自由行買咩！？

最後就到我地今日既重頭戲－蠟像館．．．．．不過呢真係太多自由行喇，影每張相都要等啦，同人爭啦，影影下都冇乜心機添，最慘係X Japan既Yoshiki蠟像原來已經唔係香港．．．．．噢．．．

睇完搭車落返灣仔，仲食左個好難食既大快活飯．．．．點解大快活而家用啲咁難食既米架，我唔會再係大快活食飯！

假期第三天

聽聞打風，所以今日主打都係留係屋企，不過呢唔知係個病未好定係我懶．．．今日都係訓多！！

香港7點就掛左8號風球，都諗到個風捱唔到幾耐架喇．．．．結果今朝9點幾個風球就落左喇．．．

點解香港打親風都係夜晚打既，唔通真係李氏力場作怪．．